حەكیم: پشتیووانیی لە هەموارکردنەوەی یاسای هەڵبژاردن ناکەین

ئاڤا نیوز

 

سەرۆكی ڕەوتی حیكمەی نیشتمانی لە پانێڵێکدا لە نۆیەمین دیداری سلێمانی ڕایگەیاند، چەک تەنیا دەبێت لە دەستی دەوڵەتدا دەبێت و ئەم بابەتە جێگەی گفتوگۆ نییە. جەختیش دەکاتەوە کە ڕەوتەکەیان پشتیووانیی لە هەموارکردنەوەی یاسای هەڵبژاردن ناکات.

 

چیرۆکی سەرەکی: ئەمڕۆ نۆیەمین دیداری سلێمانی لە زانکۆی ئەمرکی بە بەشداریی زیاتر لە 700 بەرپرسی ناوخۆیی و جیهانی دەستیپێکرد و ماوەی دوو ڕۆژ بەردەوام دەبێت و چەندین پانێڵ لەخۆدەگرێت. بەشێك لە سەرکردەکانیش وتاریان دەبێت.

 

لێدوانی فەرمی: عەممار حەكیم، سەرۆكی ڕەوتی حیكمەی نیشتمانی ڕایگەیاند، یاسای هەڵبژاردن چەندین مانگی خایاند تا جێگیركرا و ئێستاش کە باس لە هەمواركردنی یاساكە دەكرێت کە تەنیا لە هەڵبژاردنی پارێزگاكاندا جێبەجێكراوە و سەرکەوتوو بووە. بۆیە ئەم داوایە شتێكی سەیرە، "ئێمەش پشتیووانی لەم یاسایەی ئێستای هەڵبژاردن دەكەین، بەوپێیەی یاسایەكی دادپەروەرانەیە و لەگەڵ هەمواركردنەوەی نین".

 

زانیاریی زیاتر: بەشێکی دیکە لە وتەکانی عەممار حەكیم، سەرۆكی ڕەوتی حیكمەی نیشتمانی: 

-دەبێت لە ماوەی بانگەشەی هەڵبژاردن، لایەنەکان کار بۆ شکاندنی یەکتر نەکەن.

- سیستمی سەرۆکایەتی جێگەی دوو دڵییە و سیستمی پەرلەمانی هاوبەشییە و گونجاوترە، بەڵام دەبێت لایەنەکان لەسەر بنەمای سەرووی مەزهەب و نەتەوە هاوپەیمانی پێکبهێنن.

- چەک تەنیا دەبێت لە دەستی دەوڵەتدا دەبێت و ئەم بابەتە جێگەی گفتوگۆ نییە، ئێمە لەگەڵ تێکەڵکردنەوەی گرووپەکانین لەگەڵ دامەزراوە فەرمییەکان.

- هاوسەنگی لە پەیوەندییە سیاسیی و ئابوورییەکان بۆ عێراق گرنگە و پشتیووانیی دەکەین، دەبێت هەوڵیش بدەین لە بوارەکان بە گشتی و بە تایبەتیش  وزە، بگەین بە ئاستی خۆبژێویی.

- بەشێوەیەكی ئارام خەریكین بۆ ڕێكخستنی گرووپە چەكدارەكان لەناو دامەزراوەكانی دەوڵەت.

- هەندێك پێیوایە دەبێت بەشێوەیەكی تووند مامەڵەیان لەگەڵ بكرێت ئەمە كارێكی خراپە و ئەنجامی خوازراوی نابێت.

- یاسای هەڵبژاردن چەندین مانگی خایاند تا جێگیركرا.

- كاتێك باس لە هەمواركردنی یاساكە دەكرێت كە تائێستا تەنها لە هەڵبژاردنی پارێزگاكاندا جێبەجێكراوە، ئەم داوایە شتێكی سەیرە.

- ئێمە پشتیووانی لەم یاسایەی ئێستای هەڵبژاردن دەكەین بەوپێیەی یاسایەكی دادپەروەرانەیە و لەگەڵ هەمواركردنەوەی نین.