ئیسرائیل و ئەمریکا لە پاریس بە نهێنی کۆدەبنەوە

ئاڤا نیوز

بەرپرسانی باڵای ئیسرائیل بەنهێنی لەگەڵ ستیڤ ویتکۆف، نوێنەری تایبەتی ترەمپ بۆ ڕۆژهەڵاتی ناوەڕاست سەبارەت بە دانوستانە ئەتۆمییەکانی تاران و واشنتن کۆبوونەتەوە.

وێنە گەورەکە: بڕیارە سەرەتای هەفتەی داهاتوو جارێکی دیکە شاندی باڵای ئێران و ئەمریکا لەسەر بەرنامە ئەتۆمییەکەی تاران کۆببنەوە و ئیسرائیلیش نیگەرانە لەوەی واشنتن دەرفەتێکی دیکە بە تاران بدات و سزاکانی سەر ئەو وڵاتە هەڵبگرێت.

لێدوانی فەرمی: سێ سەرچاوەی ئیسرائیلی ئاگادار لە کۆبوونەوەکە بە ئاکسیۆسی ئەمریکییان ڕاگەیاندووە، هەریەک لە ڕۆن دێرمەر، وەزیری کاروباری ستراتیژی ئیسرائیل و دەیڤید بارنیا، بەڕێوەبەری دەزگای هەواڵگری مۆساد لە شاری پاریس کۆبوونەوەیەکی ڕانەگەیەندراویان لەگەڵ ستیڤ ویتکۆف، نوێنەری تایبەتی ئەمریکا بۆ ڕۆژهەڵاتی ناوەڕاست ئەنجامداوە.

زانیاریی زیاتر: لە کۆبوونەوەکەدا گفتوگۆ لەسەر دانوستانەکانی ئەمریکا و ئێران کراوە. ستیڤ ویتکۆف جەختی لەوە کردووەتەوە، ئامانجی ئیدارەی ترەمپ چارەسەرکردنی قەیرانی ئەتۆمییە لە ڕێگەی دیپلۆماسییەوە و دڵنیابوون لەوەی ئێران چیتر یۆرانیۆم ناپیتێنێت.

ئەوەی پێویستە بیزانیت: گەڕی دووەمی دانوستانەکانی نێوان تاران و واشنتن، ڕۆژی شەممە لە باڵیۆزخانەی عومان لە ڕۆما بەڕێوەدەچێت. پێشبینی دەکرێت لە دەوروبەری کاتژمێر 12ـی نیوەڕۆ دانوستانەکان دەستپێبکەن و لانیکەم پێنج کاتژمێر بخایەنێت.

ئەمەش بزانە: بەپێی زانیارییەکان ئەمریکا دەیەوێت لە گەڕی دووەمی دانوستانەکان چوارچێوەیەک بۆ هەنگاوەکانی داهاتوو لە دانوستانەکاندا دیاریبکرێت.