بەتۆمەتی گەندەڵی بڕیاری زیندانیکردن بۆ وەزیرێکی کوردستان دەردەکرێت

ئاڤا نیوز

وەزیرێکی کابینەی حەوتی حکومەتی هەرێمی کوردستان بە تۆمەتی گەندەڵی و بەهەدەردانی 170 دەفتەر دۆلار سزای دوو ساڵ زیندانی بۆ دەرچوو.

ئەوەی پێویستە بیزانیت: وەزیرەکە ناوی سەباح ئەحمەدە و لە پشکی یەکێتی وەزیری کاروباری شەهیدان و ئەنفالکراوان بووە لە کابینەی حەوتەم.

ئەمەش بزانە: سزاکەی بە ئامادە نەبوو بۆ دەرچووە و دیار نیە لە کوێیە،  ئاڤا بە دوو ژمارە تەلەفۆنی بۆ  وەزیرەکە کردووە و وەڵام ناداتەوە کە ژمارە تەلەفۆنێکی هی بەریتانیایە، ئەوی دیکەیشیان ژمارەی ئاسیایە.

زانیاریی تایبەت: سەرچاوەیەک لە دادگای کەتنی هەولێر کە تایبەتە بە بینین و لێکۆڵینەوە لە دۆسیەکانی دەستەی دەستپاکی بە ئاڤای گوتووە: ئەم وەزیرە ناسراوە بە مامۆستا ئارام سامانی، گەشتی بەهەدەر داوە و سزای دوو ساڵ زیندانی بۆ دەرچووە.

- دۆسیەکە لە دەستەی دەستپاکییەوە ڕەوانەی دادگا کراوە، سەرچاوەیەکیش لە دەستەی دەستپاکی بە ئاڤای گوت، بەهۆی ئامادەنەبوونی خۆی لە دادگا مامۆستا ئارام بە ئامادە نەبوو سزا دراوە، پارێزەریشی نەبووە و لە دەرەوەی وڵاتە، تا ئێستا شوێنی نیشتەجێبوونیشی دیار نیە.

- ئەوکاتەی مامۆستا ئارام وەزیری شەهیدان بووە لەنێوان ساڵانی 2012 بۆ 2014، بڕی یەک ملیۆن و 700 هەزار دۆلار، واتە 170 دەفتەر دۆلاری بە کۆمپانیایەک داوە بۆ ئەوەی ڕێورەسمێکی شایستە و گەورە ڕێکبخات بۆ ساڵڕۆژی کیمیابارانی هەڵەبجە. بەڵام کۆمپانیاکە ڕێورەسمێکی گەورەی ڕێکنەخستووە کە بە گوێرەی ئەو بڕە پارەیەی بۆ دانرابوو.

لەلایەکی دیکەوە: سەرچاوەیەک لە وەزارەتی شەهیدان و ئەنفالکراوان بابەتەکەی پشتڕاستکردەوە و بە ئاڤای وت، چاودێری دۆسیەکە دەکەین.

هاوکات: سەرچاوەکەی دادگای کەتنی هەولێر دەڵێ، حوکمی زیندانیکردنەکە حوکمێکی کۆتایی نیە، تۆمەتبارەکە دەتوانێت داوای دادگاییکردنی بکاتەوە، بەمەرجێک خۆی ئامادە بێت.