فایلی خەڵک؛ دانیشتووانی کۆمەڵگای چڕە لە شێخان داوای پردێکی پەڕینەوە دەکەن

 

ئاڤا نیوز

بەهۆی نەبوونی پردی پەڕینەوەی پیادە لەسەر جووتسایدی کۆمەڵگەی چڕەی سەر بە قەزای شێخان، مەترسی لەسەر ژیانی دەیان هاووڵاتی ناوچەکە دروست بووە.

چیرۆکی سەرەکی: لە ساڵی 2015ـەوە جووتسایدی کۆمەڵگای چڕەی سەر بە قەزای شێخان دروستکراوە، کە ڕێگەی سەرەکی و بازرگانی نێوان هەولێر و دهۆکە. ڕۆژانە سەدان ئۆتۆمبێلی گەورە و بچووک بە شەو و ڕۆژ هاتووچۆی تێدا دەکەن، کەچی تاوەکو ئێستا یەک پردی پەڕینەوەی خەڵکی تێدا دروستنەکراوە و ڕۆژانە ژمارەیەکی زۆری هاونیشتمانیان بەپیادە بۆ کاروبارەکانیان لەو شەقامە مەترسیدارە دەپەڕنەوە.

لێدوانی فەرمی: میهران نێروەیی، بەڕێوەبەری ناحیەی قەسرۆک بە ئاڤای ڕاگەیاند: داواکاری ئەو خەڵکە ڕەوایە و هەوڵدەدەن بەزووترین کات پردێکی پەڕینەوەیان بۆ دروستبکرێت.

زانیاریی زیاتر: 16 هەزار کەس لە کۆمەڵگای چڕە دەژین و گللەییان هەیە، دەڵێن چەندین جار خەڵک لەکاتی پەڕینەوەدا تووشی ڕووداوی هاتووچۆ بوون، چەندین جاریش داواینکردووە پردێکی پەڕینەوەیان بۆ دروستبکرێت، بەڵام تاوەکو ئێستا کەس بەدەم داواکارییانەوە نەهاتووە.

یەکێک لە قوربانیانی ئەو ڕێگەیەش قوتابییەکی 13 ساڵانە و بەهۆی لێدانی بارهەڵگرێک قاچێکی لەدەستداوە.

پێش دوو ساڵ ڕەزامەندی درووستکردنی پردێکی پیادە بۆ کۆمەڵگاکە دراوە، بەڵام تاوەکو ئێستا دروست نەکراوە.

ئەوەی پێویستە بیزانیت: ڕۆژانە زیاتر لە 500 قوتابی هاتووچۆ لەسەر ئەو شەقامە دەکەن و دەپەڕنەوە و مەترسی ئەوەیە هەیە ئۆتۆمبێل لێیان بدات.