عومان: دانوستانەکانی ئەمریکا و ئێران زۆر ئەرێنی بوون

ئاڤا نیوز

ئەمریکا و ئێران خولی دووەمی دانوستانەکانیان سەبارەت بە بەرنامەی ئەتۆمی تاران کۆتایی پێهێنا و عومان دەڵێت، دانوستانەکانیان بوونیادنەر بووە.

وێنە گەورەکە: گفتوگۆکانی تاران و واشنتن قۆناغێکی دیکەی بڕی و بڕیارە هەفتەی داهاتوو گەڕێکی دیکەی دانوستانەکان ئەنجامبدرێت.

لێدوانی فەرمی: وەزارەتی دەرەوەی عومان ڕایگەیاند، دەرئەنجامی کۆبوونەوەکان ڕێککەوتنی لایەنەکان بووە بۆ ئەوەی دانوستانەکان بچنە قۆناغی داهاتووەوە بە ئامانجی گەیشتن بە ڕێککەوتنێکی دادپەروەرانە، هەمیشەیی و پابەندکەر کە گەرەنتی ئەوە بکات ئێران بە تەواوەتی دەستبەرداری چەکی ئەتۆم بێت و بە تەواوەتی سزاکانی سەری هەڵبگیردرێت، لەهەمان کاتدا مافی ئەو وڵاتە بۆ پەرەپێدانی وزەی ئەتۆمی بۆ مەبەستی دابینکردنی وزە بپارێزرێت.

- گفتوگۆ و پەیوەندیی ڕوون تاکە ڕێگەیە بۆ گەیشتن بە لێکتێگەیشتن و ڕێککەوتنێکی متمانەپێکراو کە لە خزمەتی بەرژەوەندیی هەموو لایەنەکان بێت لەسەر ئاستی هەرێمایەتی و نێودەوڵەتیدا.

- لە چەند ڕۆژی داهاتوودا خولی داهاتووی گفتوگۆکان لە شاری مەسقەتی پایتەختی عومان بەڕێوەدەچێت.

لەلایەکی دیکەوە: بەدر بوسەعیدی، وەزیری دەرەوەی عومان ڕایگەیاند، دانوستانەکان زۆر بەرەوپێش دەچن، ئێستا تەنانەت ئەوەی بەدوور دەزانرا بەهۆی گفتوگۆکانەوە بێتە ئاراوە، ئەگەری هەیە ڕووبدات.

زانیاریی بەدەستهاتوو: بەرپرسێکی ئەمریکا کە نەیویستووە ناوەکەی ئاشکرا بکرێت بە میدیاکانی ئیسرائیلی ڕاگەیاندووە، "دانوستانەکانی ئەمریکا و ئێران بەرەوپێشچوونی زۆر باشی بەدەستهێناوە و ڕێککەوتووین هەفتەی داهاتوو جارێکی دیکە کۆبوونەوەکان لە نێوان تاران و واشنتن بەردەوام بێت".