لە عێراق سێ هەزار کەس لەسەر ماددەی هۆشبەر دەستگیر کراون

ئاڤا نیوز

 

وەزارەتی ناوخۆی عێراق دەڵێت، لە چارەگی یەکەمی ئەمساڵدا سێ هەزار و 6 کەس بەتۆمەتی پەیوەست بە ماددەی هۆشبەر دەستگیرکراون، دەستیش بەسەر دوو تۆن و 166 کیلۆگرام ماددەی هۆشبەردا  گیراوە.

 

وێنە گەورەكە: ماوەی چەند ساڵێكە بەكارهێنان و بازرگانیكردن بە ماددە هۆشبەرەكان و كارتێكەرە عەقڵییەكان لە عێراق لە حاڵەتەوە بووەتە دیاردە، بڕێكی زۆری ماددەی هۆشبەر لە ئێران و پێشتریش لەسەردەمی حكومڕانی ئەسەد، لە سووریا دەهێنرایە ناوخۆی عێراق، ئامارەكان ئاماژە بە هەڵكشانی ترسناكی ڕێژەی بەكارهێنەران و بازرگانانی ماددەی هۆشبەر دەكەن.

 

- بەڕێوەبەرایەتی نەهێشتنی ماددە هۆشبەرەکان لە وەزارەتی ناوخۆی عێراق لە ڕاگەیێنراوێکدا ئاماژەی بەوەکردووە، لە چارەگی یەکەمی ئەمساڵدا سێ هەزار و 6 کەس بەتۆمەتی پەیوەست بە ماددەی هۆشبەر دەستگیر کراون، لەو ژمارەیەش 973 کەس دۆسییەکانیان یەکلاییبووەتەوە و لەلایەن دادگاوە سزادراون.

 

- ئەوەشی خستووەتەڕوو، دەست بەسەر دوو تۆن و 166 کیلۆگرام ماددەی هۆشبەردا گیراوە، لە ئۆپەراسیۆنی دەستگیرکردنی تۆمەتبارانیشدا، دوو کەس کوژراون و 13ی دیکەش برینداربوون.