پەرلەمانتارێکی عێراق: بەمزوانە نووسراوی فەرمانی دەستگیرکردنی ئەحمەد شەرع بڵاودەکەینەوە

ئاڤا نیوز

 

پەرلەمانتارێکی عێراق ئاشکرای دەکات، پێشتر ئەنجوومەنی باڵای دادوەریی عێراق فەرمانی دەستگیرکردنی بۆ ئەحمەد شەرع، سەرۆککۆماری سووریا دەرکردووە و لەم نزیکانەش نووسراوەکە بڵاودەکرێتەوە.

 

چیرۆکی سەرەکی: هەرچەندە پشتڕاستنەکراوەتەوە ئەنجوومەنی باڵای دادوەریی عێراق هیچ فەرمانێکی دەستگیرکردنی بۆ ئەحمەد شەرع، سەرۆککۆماری سووریا دەرکردبێت، بەڵام بەشێک لە شیعەکان دەڵێن، شەرع فەرمانی دەستگیرکردنی هەیە و داوا دەکەن بەشداری لە لوتکەی عەرەبی نەکات کە بڕیارە لە مانگی داهاتوو لە بەغدا بەڕێوەبچێت.

 

ئەوەی پێویستە بیزانیت: ئەحمەد شەرع، کە پێشتر بە ئەبو محەممەد جۆلانی ناسراو بوو، لە ڕیزەکانی ڕێکخراوی قاعیدە لە عێراق، شەڕی دژی هێزەکانی ئەمریکا و عێراق کردووە و دواتر پەیوەندی بە ڕێکخراوی داعشەوە کردووە، دوای ئەوەش لەو ڕێکخراوە جیابووەوە و گرووپێکی چەکداری بە ناوی "جەبهەی نوسرە" لە سووریا دامەزراند.

 

ڕاگەیێنراوی فەرمی: مستەفا سەنەد، ئەندامی پەرلەمانی عێراق لە گرتە ڤیدیۆیەکدا ڕایگەیاند: وەزارەتی دەرەوەی عێراق لە نووسراوێكی فەرمییدا پرسیاری لە ئەنجوومەنی باڵای دادوەری كردووە، کە ئایا ئەحمەد شەرع لەلایەن ئەنجوومەنی باڵای دادوەری عێراقەوە داواکراوە یاخود نا، ئەنجوومەنی باڵای داوەری عێراق وەڵامی داوەتەوە، بەڵێ‌، داواكراوە و بەمزووانە نووسراوە فەرمییەکەی ئەنجوومەنی باڵای دادوەری عێراق دەبینن.

 

ئەمەش بزانە: محەممەد شیاع سوودانی، سەرۆکوەزیرانی عێراق دووپاتیکردووەتەوە، عێراق، ئەحمەد شەرعی بۆ لوتکەی وڵاتانی عەرەبی بانگهێشت کردووە، کە بڕیارە لە مانگی داهاتوودا لە بەغدا بەڕێوەبچێت.