چوار داعش لەنێو كەمپی هۆل دەستگیر دەكرێن

ئاڤا نیوز

ئاسایشی ئیدارەی خۆسەر ڕایدەگەیەنێت، لە ئۆپەراسیۆنێكی سەربازیدا، چوار چەكداری داعشیان لەنێو كەمپی هۆل دەستگیركردووە.

وێنە گەورەكە: دوای تێكشكاندنی ڕێكخراوی تیرۆرستی داعش، دەیان هەزار خێزان و منداڵی ئەندامانی داعش لەنێو كەمپی هۆل لە نزیك شاری حەسەكە لە ڕۆژئاوای كوردستان نیشتەجێ كران، ئەمەش بووەتە مەترسیی ڕاستەقینە بۆ پەروەردەكردنی نەوەیەكی نوێ بە هزری توندڕەویی، هاوكات هەڕەشەیە بۆ سەر سەقامگیریی ناوچەكە، لەو چوارچێوەیەشدا هێزە ئەمنییەكانی ڕۆژئاوای كوردستان ناوە ناوە ئۆپەراسیۆنی سەربازی و هەڵمەتی گەڕان و پشكنین بۆ دۆزینەوەی شانە نووستووەكانی نێو كەمپەكە ئەنجام دەدەن.

ڕاگەیێنراوی فەرمی: ئاسایشی ئیدارەی خۆسەر لە ڕاگەیێنراوێكدا كە لە ئاژانسی هەواڵی هاوار نیوز بڵاوكراوەتەوە ئاماژەی بەوە كردووە، ئۆپەراسیۆنی سەربازی بۆ ڕۆژی سێیەم لەسەریەك لەنێو كەمپی هۆل بەردەوامە، لەو چوارچێوەیەشدا، چوار چەكداری داعشیان دەستگیركردووە، هاوكات لەشوێنی دەستگیركردنەكەیاندا، ژمارەیەك چەك و تەقەمەنی دۆزراوەتەوە و دەستی بەسەردا گیراوە.

لە لایەكی دیكەوە: جیهان حەنان، ئەندامی تیمی ئیداریی كەمپی هۆل بە ئاژانسی هاوار نیوزی ڕاگەیاندووە، ژن و منداڵانی داعش بە بەردەوام هەوڵی هەڵاتن لە كەمپەكە دەدەن، بەڵام ئەوانەی هەوڵی هەڵاتن دەدەن لەلایەن هێزە ئەمنییەكانی دەوروبەری كەمپەكەوە دەستگیر كراونەتەوە.

ڕوونیشی كردەوە، زۆرجار لەلایەن ئافرەت و مێرمنداڵەكانەوە هێرش دەكرێتە سەر كارمەندان و تیمە بیانییەكان كە بە ئەركی بەڕێوەبردن و هاوكاریكردنی نیشتەجێبووانی نێو كەمپەكە هەڵدەستن.