وەزارەتی تەندروستی تورکیا نەشتەرگەری منداڵبوونی پلان بۆ داڕێژراو قەدەغە دەکات

ئاڤا نیوز

 

وەزارەتی تەندروستی تورکیا بە مەبەستی هاندانی منداڵبوونی سروشتی، هەمووجۆرە نەشتەرگەرییەکی پلان بۆ داڕێژراوی پێشوەختەی منداڵبوون، بەبێ ئەوەی هیچ کێشەیەکی تەندروستی هەبێت کە ڕێگری لێبکات بۆ ئەوەی بە سروشتی منداڵی ببێت، قەدەغە دەکات. 

 

بۆچی گرنگە: ئەم بڕیارە بۆ ئەوەیە کە ڕێگری لە نەشتەرگەری منداڵبوون بکرێت کە لەو وڵاتە ڕێژەکەی بەرەو زیادبوون دەچێت.

بڵاوکراوەی فەرمی: ڕێسای دامەزراوەکانی چاودێری تەندروستی کە تایبەتە بە دەستنیشانکردن و چارەسەری نەخۆشخانەی دەرەوە لە ڕۆژنامەی فەرمیدا لە 19ی نیسان بڵاویکردووەتەوە، "ناتوانرێت نەشتەرگەری قەستەرەیی پلان بۆ داڕێژراو لە ناوەندە پزیشکییەکان ئەنجام بدرێت".

چیرۆکی سەرەکی: وەزارەتی تەندروستی تورکیا لە چواچێوەی  پرۆگرامی" تەندروستی سەدساڵەی تورکیا"،  خزمەتگوزارییە تەندروستییەکانی لە ناوەندە پزیشکییەکان و نەخۆشخانەکان ڕێکدەخاتەوە، یەکێک لەو بڕیارانە قەدەغەکردنی منداڵ بوونە بە نەشتەرگەری، ئەمە لە کاتێکدا ئەگەر دایکەکە هیچ کێشەیەکی تەندروستی نەبێت بۆ ئەوەی بە سروشتی منداڵی ببێت، بەڵام خۆی داوا بکات زووتر بەنەشتەرگەری منداڵەکە بۆ دەربهێنرێت بە تەواوی ڕێگەی لێدەگیرێت. 

زانیاریی زیاتر: ئەم ڕێسایە تەنیا ناوەندە پزیشکییەکان دەگرێتەوە نەک نەخۆشخانە تایبەتەکان.

کاردانەوەکان: پ.د. ئیسماعیل مەتە ئیتیل دەڵێت:نەشتەرگەری منداڵبوون پێویستی بە چاودێری هەیە و بۆیە باشتر وایە لە شوێنێکدا ئەنجام بدرێت کە ئەگەری مانەوەی شەوانە هەبێت، پڕۆفیسۆر ئیتیل وتی "بەڵام لە ناوەندە پزیشکییەکان چارەسەری نەخۆشخانەیی نییە، بۆیە قەدەغەکردنی هەڵە نییە".

 ئەمەش بزانە: ساڵی 2017 تورکیا بوو بە پێشەنگی جیهان لەم بوارەدا و زۆرترین نەشتەرگەری منداڵبوونی پلان بۆداڕێژراوی تیدا ئەنجامدراوە.