پڕۆژەی دارستانی سەروچاوە دروست دەكرێت

ئاڤا نیوز

بە پشت بەستن بە  بەنداوی سەروچاوە لە ئیدارەی ڕاپەڕین، دوو شوێنی جیاواز بۆ دروستكردنی دارستان بە بودجەی 130 ملیۆن دینار تەرخانكراوە.

چیرۆكی سەرەكی: ماوەی چەندین ساڵە بەنداوی سەروچاوە بووەتە شوێنێكی گەشتیاریی؛ درووستكردنی دوو دارستانەش لەو ناوچەیە گرنگییەكی زۆری دەبێت بۆ هاونیشتیمانیانی ناوچەكە و ڕاكێشانی گەشتیاری زیاتر.

لێدوانی فەرمی: ئەندازیار ئیسماعیل محەممەد، بەڕێوەبەری دارستان و پاوانی ڕاپەرین بۆ ئاڤا نیوز گوتی: پڕۆژەی دارستانی سەروچاوە، دوو جێگەی بۆ تەرخانكراوە (گردی قوماوان كە 50 دۆنمە و شەش هەزار نەمامی تێدا دەڕوێنرێت لەگەڵ گردی قەبرستانی سەر بەنداوی سەروچاوە كە شەش دۆنمە و بڕی 750 نەمانی لێ دەڕوێنرێت).

ئەوەی پێویستە بیزانیت: پڕۆژەكە لە 15-12-2023 دەستپێكراوە لە 15-04-2024 دارستانەكان تەواو دەبن؛ بۆماوەی سێ مانگ كاركردن تێیدا بەردەوام دەبێت، ڕۆژانە 25 كرێكار كاری تێدا دەكات كە مەرجە خەڵكی ناوچەكە بن كە هەلی كار باشی بۆ گەنجان ڕەخساندووە.