ڕاکان جبووری بە کەفالەت ئازاد کرا

ئاڤا نیوز

 

دوای دەستگیرکردنی لە بەغدا بەتۆمەتی گەندەڵی و بەهەدەردانی سامانی گشتی، ڕاکان جبووری، پارێزگاری بە وەکالەتی پێشووی کەرکووک بە کەفالەت ئازاد کرا.

 

چیرۆکی سەرەکی: ڕۆژی دووشەممە، دادوەری لێکۆڵینەوە لە دادگای تاوانەکانی ڕەسافە بڕیاری دەستبەسەرکردنی ڕاکان جبووری بۆ ماوەی سێ ڕۆژ دەرکرد، تاوەکو لێکۆڵینەوەکان تەواو دەبن.

 

زانیاریی بەدەستهاتوو: بەپێی زانیارییەکانی ئاڤا کەمێک پێش ئێستا ڕاکان جبووری، پارێزگاری پێشووی کەرکووک بە وەکالەت پاش ئەوەی ڕۆژی دووشەممە بەتۆمەتی گەندەڵی و بەهەدەردانی سامانی گشتی دەستگیرکرابوو، ئەمڕۆ بە کەفالەت ئازاد کرا.

 

لێدوانی فەرمی: ڕۆژی دووشەممە، سەرچاوەیەکی نزیک لە ڕاکان جبووری بە ئاڤا میدیای ڕاگەیاند: یەکێک لە هۆکارەکانی دەستگیرکردنی ڕاکان جبووری دیار نەمانی بڕێک پارەیە لە دوو پرۆژەی ناو کەرکووک، کە بە نزیکەی یەک ملیار دینار مەزەندە دەکرێت، جگە لەوەش سەروەرت و سامانێکی زۆر بە ناوی کەسوکاری ڕاکان جبوورییەوە کراوە لە کەرکووک.