ڕووسیا باڵیۆزی سویسرا بۆ لێپێچینەوە بانگهێشت دەکات

ئاڤا نیوز

 

دوای ئەوەی سویسرا پشتگیریی لەوە کرد ئۆکراینا سامانە ڕاگیراوەکانی ڕووسیا بە کار بهێنێت، ڕووسیا باڵیۆزی سویسرای بۆ لێپێچینەوە بانگهێشت کرد.

 

چیرۆکە سەرەکییەکە: هەفتەی ڕابردوو یاسادانەرانی سویسرا زنجیرەیەک پێشنیاریان پەسەند کرد کە وا دەکەن سویسرا و وڵاتانی ڕۆژئاوا ملیاران دۆلاری سامانی ڕاگیراوی ڕووسیا بۆ قەرەبووکردنەوەی ئۆکراینا بە کار بهێنن. گەرچی ڕۆژئاوا بە گشتی بیرۆکەکەیان پێ باشە، بەڵام هێشتا کۆدەنگییەک لەسەر چۆنێتیی جێبەجێکردنی بیرۆکەکە نییە.

 

لێدوانی فەرمی: وەزارەتی دەرەوەی ڕوسیا ڕایگەیاند:  باڵیۆزی سویسرامان بانگهێشت کردووە بۆ سەرکۆنەکردنی ئەو هەنگاوە، کە پێشێلکردنێکی گەورەی بنەما و بنەڕەتی یاسا نێودەوڵەتییەکانە. هەر دەستدرێژییەک بۆ سەر موڵکی دەوڵەتی ڕووسیا، لەژێر هەر ناوێکدا بێت، لە دزی زیاتر هیچی تر نییە، ئەویش دزییەکە لەسەر ئاستی حکومەت .

 

باکگراوند: دوای هێرشی ڕووسیا بۆ سەر ئۆکراینا لە 2022دا، وڵاتانی ڕۆژئاوا نزیکەی 300 ملیار دۆلاری یەدەگ و سامانی بانکی ناوەندیی ڕووسیایان ڕاگرت. تەنيا لە سویسرا زیاتر لە هەشت ملیار دۆلاری ڕووسیا ڕاگیراوە.