واڵتز: ئیدارەی ترەمپ جیاوازتر لە ئیدارەکانی دیکە لەگەڵ پرسی ئێران مامەڵە دەکات

ئاڤا نیوز

ڕاوێژکاری ئاسایشی ئەمریکا لەبارەی دانووستانەکانی ئێران و ئەمریکا جەخت دەکاتەوە، پێشکەوتن بەدیهاتووە بەراورد بە ئیدارەکانی پێشووی ئەمریکا.

وێنە گەورەکە: هەوڵەکان بە نێوەندگیریی عومان بۆ ڕێککەوتنی نێوان ئەمریکا و ئێران سەبارەت بە بەرنامە ئەتۆمییەکی ئێران بەردەوامە و تا ئێستا دوو گەڕی کۆبوونەوەکانی نێوانیان بەڕێوەچووە.

لێدوانی فەرمی: مایک واڵتز، ڕاوێژکاری ئاسایشی ئەمریکا ڕایگەیاند، دۆناڵد ترەمپ سەرۆکی ئەمریکا لە هەڵوێستەکەیدا زۆر ڕوون بوو کاتێک گوتی "ئێران هەرگیز ناتوانێت خاوەنی چەکی ئەتۆمی بێت، دەشڵێت، هەموو بژاردەکان لەسەر مێزن سەبارەت بە ئێران، بەڵام ترەمپ بە ڕەهایی پێی باشە بگەنە ڕێککەوتن".

لە لایەکی دیکەوە: عەباس عێراقچی، وەزیری دەرەوەی ئێران لەبارەی دانووستانەکان جەخت دەکاتەوە وڵاتەکەی لەسەر بنەمای ڕێز و یەکسانی مامەڵە لەگەڵ ئەمریکا دەکات.

ئەوەی پێویستە بیزانیت: بڕیار وابوو ڕۆژی چوارشەممە شاندی تەکنیکی ئەمریکی و ئێرانی کۆببنەوە ئەمەش وەک ئامادەکارییەک بۆ گەڕی سێیەمی کۆبوونەوەکان کە بڕیار بوو شەممە بەڕێوەبچێت، بەڵام کۆبوونەوەکەی چوارشەممە بۆ شەممە دواخرا، ئیسماعیل بەقائی وتەبێژی وەزارەتی دەرەوەی ئێران ئاماژەی بەوەکرد، ئەمە پێشنیازی عومانە کە نێوەندگیریی کۆبوونەوەکانی ئێران و ئەمریکا دەکات.