نەشتەرگەری دەرهێنانی چەوری لە سلێمانی قەدەغە دەکرێت

ئاڤا نیوز

بەڕێوەبەرایەتی گشتیی تەندروستیی سلێمانی لەبارەی نەشتەرگەری دەرهێنانی چەورییەوە هۆشداری بە نەخۆشخانەکان دەدات.

وێنە گەورەکە: شەوی سێشەممەی ڕابردوو، بەهۆی نەشتەرگەری دەرهێنانی چەورییەوە لە یەکێک لە نەخۆشخانە تایبەتەکانی سلێمانی، کەسێک بەناوی 'شۆخان عەبدوڵڵا' گیانی لەدەستدا، ئەمەش یەکەم حاڵەتی گیانلەدەستدان نییە کە بەهۆی ئەم جۆرە نەشتەرگەرییەوە لە سلێمانی و هەرێمی کوردستان تۆمار دەکرێت.

نووسراوی فەرمی: ڕۆژی 2025-04-23، بەڕێوەبەرایەتی گشتیی تەندروستیی سلێمانی، نووسراێکی ئاراستەی سەرجەم نەخۆشخانە حکومی و تایبەتەکان کردووە، تێیدا هۆشداری لەسەر ئەنجامدانی نەشتەرگەری دەرهێنانی چەوری دەدات.

زانیاریی زیاتر: لە نووسراوەکەدا هاتووە، لەبەر بەرژەوەندی گشتیی، ئاگادارتان دەکەینەوە کە هەموو جۆرە نەشتەرگەرییەکی تایبەت بە دابەزاندنی کێش و لابردنی چەوری ڕابگرن، تا ئەو کاتەی بە نووسراوێکی دیکە ئاگادار دەکرێنەوە ئەنجامی بدەن.

ئەوەی پێویستە بیزانیت: بەڕێوەبەرایەتی تەندروستیی سلێمانی هۆشداری لە سەرپێچیکردن و پابەندنەبوون بە نووسراوەکە دەدات، کە ڕێککاری یاسایی تووندیان بەرامبەر دەگیرێتەبەر.