تەندروستیی هەولێر بۆ هاووڵاتییان: بۆ حاڵەتی زۆر پێویست نەبێت نەچنە دەرەوە

ئاڤا نیوز

 

شەپۆلێكی خۆڵبارین هەرێمی كوردستان بەگشتی و شاری هەولێری بەتایبەتی گرتووەتەوە و بۆ خۆپارێزی لە زیانەكانی خۆڵبارین، تەندروستیی هەولێریش چەند ڕێنماییەك بڵاو دەكاتەوە و داوا لە خەڵك دەكات بۆ حاڵەتی زۆر پێویست نەبێت نەچنە دەرەوە.

 

چیرۆکی سەرەکی: شەپۆڵێكی گەرما لەژێر كاریگەری نزمەپاڵەپەستۆی دەریای سوور، عێراق و هەرێمی كوردستانی گرتووەتەوە و خۆڵبارین و تاوە بارانیشی هەڵگرتووە.

 

بڵاوكراوەی فەرمی: تەندروستیی هەولێر لەبارەی کاریگەرییەکانی خۆڵبارین ڕایگەیاند: خۆڵبارین، دەبێتە هۆی هەستیاری (حەساسییەت) و  پێڵووی چاوەکان سوور دەبنەوە و تووشی خوران دەبن، هەستیاریی لوت و بەتایبەتتر ناوپۆشی لوت سوور دەبێتەوە و تووشی هەوکردن دەبێتەوە بەمەش گیرانی لوت دروست دەبێت و کەسەکە تووشی هەناسەتەنگی دەبێت.

 

- گوشاری خوێن و خوێنبەربوون و هەوکردنی گوێچکەی ناوەڕاست زۆرجار ئەنجامی ئەم خۆڵبارینەیە و کاریگەری دروست دەکات لەسەر ئەو کەسە، ئەو کەسانەی هەناسەتەنگن و ڕەبۆیان هەیە لەگەڵ ئەم خۆڵبارینە حاڵەت و نیشانەکانیان زیاد دەکات، زۆر جار دەبێتە هۆی خورانی پێست و سوربوونەوە و نەخۆشی ئێکزیما، کاریگەری لەسەر کۆئەندامی هەناسەدان و سییەکان دروست دەکات و بەمەش کەسەکە تووشی کۆکە و پژمین و  ناڕەحەتی زۆر دەبێت چونکە ئەو دەنکۆڵانە هەڵگری میکرۆب و بەکتریان.

 

لەلایەكی دیكەوە: بەڕێوەبەرایەتیی گشتیی تەندروستیی هەولێر ڕێنوێنی هاووڵاتییان دەكات لە كاتی خۆڵباریندا ئەم كارانەی خوارەوە بكەن:

 

- داخستنی دەرگا و پەنجەرە و پاککردنەوەی شوێنی خۆڵبارین بەتایبەت بۆ ئەو کەسانەی لە ماڵەوەن.

- لە کاتی چوونە دەرەوە دەمامک ببەسترێ و ڕووپۆشی خۆت و شوێنی مانەوە بکەی بەبەردەوامی.

- دەرگا و پەنجەرە دابخە  ئەگەر بۆ حاڵەتی  زۆر پێویست نەبێت مەچۆ دەرەوە.
- زۆر خواردنەوەی شلەمەنی بەتایبەت لەکاتی شۆفێری و چوونە دەرەوە هەوڵبدرێت هەوای ناو ئۆتۆمبێل بکرێتەوە.
-  خواردنی میوە و سەوزە بەبەردەوامی.
- تێکەڵ نەبوونی هاووڵاتییان و مامەڵە نەکردنیان لەگەڵ سەگ و پشیلە کە لە ئێستادا لەلایەن هاووڵاتیانەوە گرنگی زۆری پێدەدرێت، چونکە ئەو تۆز و خۆڵە لەگەڵ فەرووی ئاژەڵەکان کێشە دروست دەکات.
- لە کاتی بوونی هەر حاڵەتێکی نەخوازراو هاووڵاتییان دەتوانن پەیوەندی بە هێڵی گەرمی ژمارە 122 بکەن.