سوودانی و فەرماندەی هاوپەیمانی نێودەوڵەتی: پشتیوانیی ئاسایشی سووریا دەکەین

ئاڤا نیوز

 

فەرماندەی گشتیی هێزە چەکدارەکانی عێراق و فەرماندەی هێزەکانی هاوپەیمانیی نێودەوڵەتیی دژی داعش کۆبوونەوە، هەردوولایەن جەخت لە بەردەوامیی هەماهەنگی بۆ ڕووبەڕووبوونەوەی تیرۆر دەکەنەوە، هاوکات پاڵپشتی ئاسایشی سووریا دەکەن بەبێ دەستوەردان لە کاروباری ناوخۆی وڵاتەکە.

 

ئەوەی پێویستە بیزانیت: بەگوێرەی ڕێککەوتنی نێوان ئەمریکا و عێراق، هەردوولا تاوەکوو ئەیلوولی 2026 لە چوارچێوەی کاری "هاوبەشی ئەمنیی دوولایەنە"، لە پێکەوەکارکردن بۆ ڕێگەگرتن لە بەهێزبوونەوەی داعش لە ڕۆژئاوای کوردستان و ناوچەکانی دیکەی ژێر دەسەڵاتی هەسەدە بەردەوام دەبن.

 

ڕاگەیێنراوی فەرمی: نووسینگەی سەرۆکوەزیرانی عێراق بڵاویکردەوە، محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکانی عێراق لەگەڵ جەنەڕاڵ کیڤن لیهی، فەرماندەی هێزەکانی هاوپەیمانیی نێودەوڵەتی بۆ بەرەنگاربوونەوەی داعش لە عێراق و سوریا کۆبووەوە، لە کۆبوونەوەکەدا دۆخی ئەمنی بەگشتی و جموجۆڵی داعش بەتایبەتی تاوتوێکراوە، هاوکات جەختیش لە بەردەوامی هەماهەنگیی ئەمنیی و مەشق و ڕاهێنان و ئاڵوگۆڕکردنی ئەزموون و زانیاریی لەنێوان هەردوولا کرا.

 

زانیاریی زیاتر: "جەخت لەسەر گرنگی پەیوەندی ستراتیژیی نێوان عێراق و ئەمریکا کرایەوە، لە چوارچێوەی ئاستەنگەکانی ئێستا و بەردەوام بوون لە بەرەنگاربوونەووی تیرۆر، هەروەها جەخت لەسەر پێویستیی پشتیوانیکردن لە ئاسایش و سەقامگیریی سوریا کرایەوە لەگەڵ دەستوەرنەدان لە کاروباری سووریا و گەیشتن بە ئاسایش و ئارامی لە سەرتاسەری ناوچەکەدا".