وەزارەتی دارایی بۆ ئاڤا: 95% تاوەکو چوارشەممەی داهاتوو مووچە دەنێردرێت

ئاڤا نیوز

وردبینیکردن لە لیستی مووچە بێ کێشە بەردەوامە و یەکشەممە یان دووشەممەی داهاتوو تەواو دەبێت، وەزارەتی دارایی کوردستان بە ئاڤای ڕاگەیاند، 95% چوارشەممە پارە دەنێردرێ و هەمان ڕۆژ خشتەی دابەشکردنی مووچە بڵاودەکرێتەوە.

ئەوەی پێویستە بیزانیت: شاندە تەکنیکییەکەی وەزارەتی دارایی کوردستان تا ئێستا لە بەغدایە بۆئەوەی وەڵامی وەزارەتی دارایی عێراق بدەنەوە ئەگەر هەر پرسیارێک یان تێبینییەکیان لەسەر لیستی مووچە هەبێت.

زانیاریی تایبەت: سەرچاوەیەکی باڵا لە وەزارەتی دارایی بە ئاڤای گوت، ئەگەر تێبینییەکی ئەوتۆ هەبێت کە پێویستی بە وەڵامدانەوە بێت لە ئاستی باڵاتر، هەفتەی داهاتوو شاندێکی دیکەی وەزارەتی دارایی دەچێتە بەغدا، وێڕای وەڵامدانەوەی هەر پرسیار و تێبینییەک ئەگەر هەبێت لەسەر لیستی مووچە و میزان موراجەعە، دەسەڵاتی بڕیاردانیشیان هەبێت و یەکسەر بڕیار بدەن و کێشەکە چارەسەر بکەن.

لەلایەکی دیکەوە: لەبارەی وادەی ناردنی پارە و بڵاوکردنەوەی خشتەی مووچە، سەرچاوەیەک لە شاندی کوردستان لە بەغدا و لە وەزارەتی دارایی لە هەولێر بە ئاڤای وت، دەکەوێتە کۆتایی هەفتەی داهاتوو، 95% ڕۆژی چوارشەممە پارە لە بەغدا دەنێردرێت و ڕاستەوخۆش خشتەی مووچە بڵاودەکرێتەوە.

- ئەوانەی لەرێگەی هەژماری من مووچە وەردەگرن کە ئەم مانگە ژمارەیان 400 هەزار دەبێ، قۆناغ بە قۆناغ پارە دەخرێتە سەر هەژمارەکانیان.

بە تەنیشت ئەم بابەتە: ئەمڕۆ ئاژانسی بەغداد ئەلیەوم بڵاوی کردەوە، ناوەڕاستی هەفتەی داهاتوو بەغدا بڕی 950 ملیار دینار بۆ مووچەی مانگی چوار بۆ هەرێمی كوردستان دەنێرێت.