حیزبەکەی سوودانی جەخت لەسەر بەڕێوەچوونی هەڵبژاردن لە وادەی خۆیدا دەکاتەوە

ئاڤا نیوز

ڕەوتی فوڕاتەین کە سەرۆکوەزیرانی عێراق سەرۆکایەتیی دەکات، دووەم کۆنگرەی گشتیی خۆی ئەنجامدا و پێداگری لەسەر بەڕێوەچوونی هەڵبژاردنی پەرلەمانی عێراق لە وادەی دیاریکراوی خۆیدا دەکات.

چیرۆکی سەرەکی: ڕەوتی فوڕاتەین محەممەد شیاع سوودانی، سەرۆکوەزیرانی عێراق ئەمینداری گشتییەتی، ئەمڕۆ هەینی، دووەمین کۆنفرانسی گشتی خۆی لە ژێر دروشمی "ئاوەدانکردنەوە و گەشەپێدان" ئەنجامدا و جارێکی دیکە سوودانی بە ئەمینداری گشتیی هەڵبژێردرایەوە.

ڕاگەیێنراوی فەرمی: ڕەوتی فوڕاتەین لە ڕاگەیێنراوێکدا ڕایگەیاند: گرنگیی ئەنجامدانی هەڵبژاردن لە وادە دەستوورییەکەیدا دووپات دەکەینەوە، له چوارچێوەی کەشێکی دادپەروەر و پاک کە ئازادیی کێبڕکێ و دەرفەتی یەکسان بۆ هەموو هێزە سیاسییەکان و بەربژێرەکان دەستەبەر بکات.

زانیاریی زیاتر: بڕیارە لە 2025-11-11، هەڵبژاردنی خولی شەشەمی پەرلەمانی عێراق بەڕێوەبچێت، دەرگای تۆمارکردنی هاوپەیمانی و حیزب و کاندیدی سەربەخۆ بۆ بەشداریکردن لە هەڵبژاردن تاوەکو 4ـی مانگی داهاتوو کراوە دەبێت.

ئەوەی پێویستە بیزانیت: لە 25ـی ئادار، ئەنجوومەنی کۆمیسیارانی کۆمیسیۆنی هەڵبژاردنەکان پرۆسەی نوێکردنەوەی تۆماری بایۆمەتری لە هەزار و 79 ناوەندی تۆمارکردن لە عێراق و هەرێمی کوردستان دەستپێکرد کە بۆ ماوەی مانگێک بوو، واتە تاوەکو 24ـی نیسان، دواتر بۆ مانگێکی دیکە درێژکرایەوە.

ئەمەش بزانە: ڕەوتی فوڕاتەین لە هەڵبژاردنی پەرلەمانی عێراق لە ساڵی 2021ـدابەشداریی کرد و یەک کورسیی بەدەستهێنا، دوای کشانەوەی ڕەوتی نیشتیمانیی شیعە (ڕەوتی سەدر) لە ساڵی 2022 دوو کورسیی بەرکەوت و کۆی ئەندامانی ڕەوتەکە لە پەرلەمان بوو بە سێ ئەندام.