جیهان چاوەڕوانی ڕێککەوتنی ئەمریکا و ئێرانە؛ ئیسرائیل نیگەرانە

جارێکی دیکە مەسقەتی پایتەختی عومان دەبێتە پردی بە یەکگەیشتنی واشنتن و تاران و بڕیارە گەڕی سێیەمی دانوستانەکانیان لەو وڵاتە بەڕێوەبچێت.

وێنە گەورەکە: دانوستانەکانی نێوان ئێران و ئەمریکا سەبارەت بە بەرنامە ئەتۆمییەکەی تاران بە خێرایی بەرەوپێش دەچێت، و بڕیارە ڕۆژی شەممە گرووپێک لە پسپۆڕانی هەردوولا لە سەر پرسە تەکنیکییەکان گفتوگۆ بکەن.

زانیاریی زیاتر: شاندی ئێران گەیشتوونەتە عومان و ئیسماعیل بەقائی وتەبێژی وەزارەتی دەرەوەی تارانیش دەڵێت، عەباس عێراقچی سەرۆکایەتی شاندی دیپلۆماتکاران و پسپۆڕانی تەکنیکی لە گفتوگۆ ناڕاستەوخۆکان لەگەڵ لایەنی ئەمریکی دەکات.

هاوکات، ستیڤ ویتکۆف نوێنەری تایبەتی ترەمپ بۆ ڕۆژهەڵاتی ناوەڕاست سەرۆکایەتی شاندی واشنتن دەکات و وەزارەتی دەرەوەی ئەمریکا ڕایگەیاندووە، مایکڵ ئەنتۆن بەرپرسی پلاندانانی سیاسەتی وەزارەتی دەرەوەی ئەمریکا سەرۆکایەتی گفتوگۆ تەکنیکییەکانی لایەنی ئەمریکا دەکات.

لێدوانی فەرمی: دۆناڵد ترەمپ، سەرۆکی ئەمریکا، ڕایگەیاند ئامادەیە لەگەڵ سەرۆککۆمار یان ڕێبەری باڵای ئێران کۆببێتەوە.

لەلایەکی دیکەوە: میدیا جیهانییەکان ئاشکرایان کردووە، ئیسرائیل لە نزیکبوونەوەی تاران و واشنتن زۆر نیگەرانە و بە هەنگاوێکی مەترسیدار بۆ سەر ئاسایشی وڵاتەکەی دەزانێت.

زانیاریی بەدەستهاتوو: بەپێی زانیارییە هەواڵگرییەکان، ئێستا تاران ئاستی پیتاندنی یۆرانیۆمی گەیاندووەتە 60%، و ئەمە زۆر زیاترە لەو بڕەی لە ڕێککەوتنی ساڵی 2015 دیاریکرابوو کە بریتیبوو لە 3.67%، بەڵام هێشتا نەگەیشتووەتە ئەو ئاستەی تاران بتوانێت ببێتە خاوەنی چەکی ئەتۆم کە پێویستی بە پیتاندنی یۆرانیۆمە بە ڕێژەی 90%.

باکگراوند: تا ئێستا دوو گەڕی دانوستان بە شێوەیەکی ناڕاستەوخۆ لەنێوان تاران و واشنتن، لە وڵاتانی عومان و ئیتاڵیا بەڕێوەچووە و هەردوولا دەرئەنجامی کۆبوونەوەکانیان بە ئەرێنی و بوونیادنەر وەسفکردووە.