خولی سێیەمی دانوستانەکانی ئێران و ئەمریکا دەستپێدەکات

ئاڤا نیوز

 

ئەمڕۆ شەممە لە عومان هەردوو شاندی ئێرانی و ئەمریکی خولی سیێەمی دانوستان ئەنجام دەدەن.

 

چیڕۆکی سەرەکی: تاران و واشنتن تاوەکو ئێستا دوو خولی دانوستانی ناڕاستەوخۆیان لە مەسقەت و ڕۆما ئەنجامداوە، عەباس عێراقچی، وەزیری دەرەوەی ئێران و ستیڤ ویتکۆف، نوێنەری ئەمریکا لە ڕۆژهەڵاتی ناوەڕاست سەرکردایەتیی دانوستانەکان کردووە، ئەمڕۆ شەممە 26-4-2025  لە مەسقەت سێیەم خولی دانوستان ئەنجام دەدەن. 

 

زانیاریی بەدەستهاتوو: بەپێی چەند سەرچاوەیەکی ئەمریکی کە سی ئێن ئێن ئاشکرایکردووە، ''دەگوترێت ئەم خولە خولێکی قورسی دانوستان دەبێت، چونکە ئەمریکا مەرجەکانی خۆی ئاشکرا دەکات ''.

 

لەلایەکی دیکەوە: دۆناڵد ترەمپ، سەرۆکی ئەمریکا لە چاوپێکەوتنێکدا لەگەڵ 'گۆڤاری تایم' ئاشکرایکرد، ئەگەر هەیە ڕێککەوتنێک لەگەڵ ئێران بکرێت، بەڵام هەڕەشەی خۆی دووپاتکردەوە کە ئەگەر دیپلۆماسییەت شکستی هێنا، هەنگاوی سەربازی لەدژی تاران ئەنجام دەدات.

 

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران لەبارەی دانوستانەکان وتی، کاری پێشینەی شاندەکە هەڵگرتنی دەستبەجێ و هەمەلایەنەی سزاکانی سەر تارانە.