هێزەکانی پشتیوانی خێرا: ئامادەین بۆ ڕاگرتنی جەنگ لە سوودان

ئاڤا نیوز

هێزەکانی پشتیوانی خێرا لە سوودان، وەڵامی ئەرێنی دەدەنەوە بۆ هەوڵەکانی ئەمریکا و وڵاتان بەمەبەستی کۆتاییهێنان بە جەنگ، هاوکات تۆمەت ئاراستەی سەرکردایەتی سوپا دەکەن.

وێنە گەورەکە: زیاتر لە دوو ساڵە هێزەکانی پشیوانیی خێرا لەگەڵ سوپای سوودان لە شەڕدان و بە هۆی ئەم شەڕەوە زیاتر لە 150 هەزار کەس کوژراون و زیاتر لە 14 ملیۆن کەسیش ئاوارە بوون.

چیرۆکی سەرەکی: ئەمڕۆ هەینی، هێزەکانی پشتیوانی خێرا بە فەرمی ڕایانگەیاند کە بە تەواوی و بە جددی وەڵامی ئەو دەستپێشخەرییانە دەدەنەوە کە ئامانجیان نێوەندگیرییە بۆ ڕاگرتنی جەنگی سوودان. ئەم هێزانە دەڵێن ئامانجیان کۆتاییهێنانە بە مەینەتییەکانی گەلی سوودان و ڕاگرتنی ئەو جەنگەی کە "بەسەریاندا سەپێنراوە"، ئەمەش وەک وەڵامێک بۆ جووڵە چڕە نێودەوڵەتییەکانی ئەم دواییە.

ڕاگەیێنراوی فەرمی: لە ڕاگەیێنراوێکدا هێزەکانی پشتیوانی خێرا دەڵێت، "بەتەواوی ڕایدەگەیەنین کە بە شێوەیەکی جددی بەدەم ئەم دەستپێشخەرییانەوە دەچین، بۆ گەلی سوودان، بۆ کۆمەڵگەی نێودەوڵەتی دووپاتدەکەینەوە کە بەربەستی ڕاستەقینەی بەردەم ئاشتی، ئەو دەسەڵاتەیە کە کۆنترۆڵی بڕیاری هێزە چەکدارەکانی کردووە."

لەلایەکی دیکەوە: پشتیوانی خێرا پەنجەی تۆمەت بۆ پاشماوەکانی ڕژێمی پێشوو و سەرکردەکانی ڕێکخراوی ئیخوان درێژ دەکەن و دەڵێن: "ئەوانن کە ئەم جەنگەیان هەڵگیرساندووە بەمەبەستی گەڕانەوە بۆ دەسەڵات، تەنانەت ئەگەر لەسەر لاشەی بێتاوانەکانیش بێت."