ترەمپ: ئەگەر ناچار بین هێرش دەکەینە سەر ئێران

ئاڤا نیوز

 

سەرۆکی ئەمریکا ڕایگەیاند، ئیسرائیل نامانکێشێتە ناو شەڕێکەوە دژی ئێران بەڵام ئەگەر ناچار بین ئەوا هێرش دەکەینە سەر ئەو وڵاتە.

وێنە گەورەکە: لە سەرووبەری بەڕێوەچوونی دانوستانەکانی ئەمریکا و ئێران بۆ ڕێککەوتن لەسەر بەرنامە ئەتۆمییەکەی ئێران جارێکی دیکە سەرۆکی ئەمریکا هەڕەشەی لە ئێران کرد و گوتی، ڕەنگە ئەمریکا ناچاربێت هێرش بکاتە سەر تاران بۆ ئەوەی تاران نەتوانێت چەکی ئەتۆمی بەدەستبهێنێت.

لێدوانی فەرمی: دۆناڵد ترەمپ، سەرۆکی ئەمریکا لە چاوپێکەوتنێکدا لەگەڵ گۆڤاری ‘Time100’  ئەمریکی  ڕایگەیاند: '' پێموایە دەتوانین بگەینە ڕێککەوتنێک لەگەڵ ئێران  بەبێ ئەوەی پێویست بکات هێرش بکەین، بەڵام "ئەگەری هەیە ناچار بین هێرش بکەین، چونکە نابێت بە هیچ شێوەیەک  ئێران چەکی ئەتۆمی هەبێت''.

زانیاریی زیاتر: سەبارەت بەوەی واشنتن ڕێگری لە ئیسرائیل کردووە بۆ هێرش ترەمپ گوتی، ''نەخێر، ئەوە ڕاست نییە، من ڕێگریم لێنەکردوون بەڵام ڕێگەم بۆ خۆش نەکردوون، گوتیشم پێم باشە ڕێککەوتنێک بکەین نەک بۆمبارانیان بکەم''.

ئەوەی پێویستە بیزانیت: عەباس عێراقچی،  وەزیری دەرەوەی ئێران بە شێوەیەکی ناڕاستەوخۆ لەگەڵ ستیڤ ویتکۆف نوێنەری ترەمپ لە ڕۆژهەڵاتی ناوەڕاست لە ڕێگەی نێوەندگیرییەکانی عومانەوە دانوستان دەکات، ئەمەش دوای هەفتەیەک لە خولی دووەم لە ڕۆما کە هەردوولا بە بنیاتنەر وەسفیان کرد.