هیچ تووشبوویێکی تای خوێنبەربوون لە هەرێمی کوردستان تۆمار نەکراوە

ئاڤا نیوز

تاوەکو ئێستا هیچ تووشبوویێکی تای خوێنبەربوون لە هەرێمی کوردستان تۆمار نەکراوە. لەلایەکی دیکەوە بۆ ڕێگری لە بڵاوبوونەوەی پەتاکە وەزارەتی تەندروستیی داواکاری هەیە.

وێنە گەورەکە: نەخۆشی تای خوێنبەربوون لە بەشێکی زۆری ناوچەکانی عێراق بڵاوبووەتەوە و ژمارەیەک هاووڵاتی تووشی نەخۆشییەکە بوونە و چەند کەسێکیش گیانیان لەدەستداوە، بەڵام لە هەرێمی کوردستان تائێستا هیچ حاڵەتێکی نەخۆشییەکە تۆمار نەکراوە.

لێدوانی فەرمی: سەرکار سورچی، وتەبێژی وەزارەتی تەندروستیی کوردستان، بە ئاڤا میدیای ڕاگەیاند، "ئێمە لای خۆمان ڕێکارەکانمان توندوتۆڵ کردووە، تاوەکو ئێستا نەگەیشتووەتە کوردستان، بەڵام نەخۆشییەکە هیچ سنوورێک نازانێ و ئەگەری بڵاوبوونەوەی هەیە، بۆیە ئاگاداری ڕێنماییەکانی وەزارەتی تەندرووستی کوردستان بن.

- هیچ گۆشتێک نەکڕن کە مۆری تەندروستی لەسەر نەبێت.

- ئاژەڵ لە ماڵەکان سەرنەبڕن، "بەتایبەت کە لە جەژنی قوربان نزیک دەبینەوە".

ئەوەی پێویستە بیزانیت: لە عێراق 26 کەس تووشبوون و پێنج کەسیش بەهۆی ئەم تای خوێنبەربوونەوە گیانیان لەدەستداوە.