ئێران و تورکیا لەیەک کاتدا کارەبا لەسەر عێراق دەبڕن و ئەویش هانا بۆ تورکمانستان دەبات

ئاڤا نیوز

 

ئێران و تورکیا بەهۆکاری جیاواز ئەو کارەبایەی بۆ عێراقی دابین دەکەن بڕیوویانە. وەزارەتی کارەبای فیدڕاڵیش دەڵێت، بۆ هاوردەکردنی گاز لێکتێگەیشتنیان لەگەڵ تورکمانستان کردووە و چاوەڕێن لە ماوەیەکی نزیکدا بکەوێتە بواری جێبەجێکردنەوە.

 

چیرۆکی سەرەکی: بەوتەی بەرپرسانی عێراق ئێستا ئاستی بەرهەمی کارەبا تەنیا بەشی 59%ی پێداویستی ناوخۆ دەکات، واتا ئەگەر هیچ کێشەیەکی نەیەتەپێش و هەموو شتێک نمونەیی بێت 14 کاتژمێر کارەبای نیشتمانی دابین دەکرێت، بەپێچەوانەوە ئەگەر گرفت هەبێت، هاوشێوەی هاوینی پار تەنیا حەوت کاتژمێر کارەبای نیشتمانی بە خەڵک دەدرێت.

 

لێدوانی فەرمی: ئەحمەد موسا، وتەبێژی وەزارەتی کارەبای عێراق بە ئاڤا میدیای ڕاگەیاند، تورکیا بەهۆی کۆتاییهاتنی ماوەی گرێبەست 300 مێگاوات کارەبای لەسەر وڵات بڕیووە، ئێرانیش بەهۆی چاکسازی لە هێڵەکانی گواستنەوەدا گازی لەسەر عێراق بڕیووە کە بۆ بەرهەمهێنانی کارەبا بەکاریان دەهێنا، بۆیە ئێستا بەتوانای ناوخۆ 19 هەزار مێگاوات کارەبا بەرهەمدەهێنن، لەکاتێکدا وڵات پێویستی بە 32 هەزار مێگاوات هەیە.

 

زانیاریی زیاتر: سەبارەت بە گفتوگۆکان لەگەڵ تورکیا، ئەحمەد موسا دەڵێت، ئەو کارەبایەی لە تورکیاوە بۆ عێراق دەهات و بڕەکەی 300 مێگاوات بوو ئێستا وەستاوە و ئێمەش لەگەڵ لایەنی تورکی سەرقاڵی لێتێگەیشتنێکی نوێین بۆ زیادکردنی هاوردە بۆ 600 مێگاوات.

 

لەلایەکی دیکە: هەرچی پەیوەستە بە گازی ئێران، وتەبێژی وەزارەتی کارەبا گوتی، بڕەکەی لەم کاتەدا 20 ملیۆن پێ سێجایە  و ئەویش بەهۆی چاکسازی لە هێڵەکانەوە لەلایەن ئێرانەوە ڕاگیراوە، ئەوەش کاریگەری هەبوو و هەندێک وێستگەی کارەبا لە بەرهەمهێنان وەستاون.

 

ئەوەی پێویستە بیزانیت: ئەحمەد موسا لەبارەی هاوردەکردنی گاز لە تورکمانستانەوە، ئاماژە بۆ ئەوەدەکات، هەنگاوی باشیان بڕیووە و لێکتێگەیشتن کراوە و لە قۆناغی وردبینییدایە.

 

پێدراوە ڕاستییەکان: ئێستا بەرهەمهێنانی کارەبا 19 هەزار مێگاواتە و وڵاتیش بۆ کارەبای بەردەوام پێویستی بە 32 هەزار مێگاوات هەیە.