پسوولەی خۆراكی سەرووی 20 ملیۆن كەس لە عێراق كراوەتە ئەلیكترۆنی

ئاڤا نیوز

وتەبێژی وەزارەتی بازرگانی عێراق ڕایدەگەیەنێت، تا ئێستا پسوولەی خۆراكی زیاتر لە 20 ملیۆن هاووڵاتی كراوەتە ئەلیكترۆنی.

وێنە گەورەکە: زیاتر لە پێنج مانگە پرۆسەی بە ئەلیكترۆنیكردنی پسوولەی خۆراك دەستی پێكردووە و سەرەتاش لە پارێزگای واست 100% كارەكانی تەواو بوون و سەركەوتوو بوو، ئێستا كۆمپانیای جێبەجێكار ئەزموونەكە لە شەش پارێزگای دیكەی عێراق جێبەجێ دەكات، هەولێریش یەكێكە لەو پارێزگایانە.

لێدوانی فەرمی: محەممەد حەنون، وتەبێژی وەزارەتی بازرگانیی عێراق بە ئاژانسی هەواڵی عێراقییەی ڕاگەیاندووە، زیاتر لە 20 ملیۆن هاووڵاتی، داتاكانیان بۆ پسوولەی خۆراك لەڕێگەی ئەپلیكەیشنی ئەلیكترۆنی، نوێ كردووەتەوە.

زانیاریی زیاتر: پارێزگاكانی واست بە ڕێژەی 100%، دیالە و دیوانیە ڕێژەی 90%ـی دانیشتوانیان داتاکانیان نوێ کردووەتەوە و پسوولەی خۆراكیان بووەتە ئەلیكترۆنی، بەڵام لە پارێزگای ئەنباڕ ڕێژەكە گەیشتووەتە نزیكەی 80%، لە پارێزگاكانی دیكەش پرۆسەكە بەردەوامە و بەم زووانەش لە پارێزگاكانی هەڵەبجە و زیقار و بەسرە، دەستپێدەكات.

ئەوەی پێویستە بیزانیت: لە قۆناغی دووەمدا ئەپڵیكەیشنێك دروست دەكرێت كە تایبەتە بە بریكار و ئەو هاووڵاتیانەی لەلای ئەو بریكارە بەشەخۆراك وەردەگرن، دەبنە گرووپێك بۆ ئەوەی زانیارییەكان لە ڕێگەی بریكارەكەوە بگاتە هاووڵاتیان.

ئەمەش بزانە: وەزارەتی بازرگانیی عێراق داوا لە سەرجەم هاووڵاتیان دەکات کە داتاکانیان تۆماربکەن بۆ پاراستنی مافەکانیان لە وەرگرتنی پسوولەی خۆراک و دڵنیابوون لە بوونیان لەنێو سیستمەکەدا.