فەرهاد زیرەک دوای دابڕانێکی زۆر لە ئاڤا دەردەکەوێت

ئاڤا نیوز

 

هونەرمەندی ناوداری کورد و شاری هەولێر دوای دابڕانێکی زۆر و ئەنجامنەدانی هیچ چاوپێکەوتنێک لە میدیاکان، لە شاشەی ئاڤا دەردەکەوێت.

 

بۆچی گرنگە: هونەرمەند فەرهاد زیرەک کە خاوەنی هەوادارێکی زۆرە لە هەرێمی کوردستان، چەند ساڵێکە هیچ بەرهەمێک و دەرکەوتنێکی لە میدیاکان نییە؛ ئەمەش وایکردووە هەر دەرکەوتنێک و لێدوانێکی کاردانەوە دروست بکات و هەوادارانی دڵخۆش بکات.

 

لێدوانی فەرمی: هونەرمەد فەرهاد زیرەک لە بەرنامەی شەقامی ڕاژان کە پێشکەشکار ڕاژان عەبدوڵڵا پێشکەشی دەکات، دەرکەوت، ڕاژان پرسیاری ئەوەی کرد ئاخۆ بەرهەمی نوێی هەیە یاخود نا، فەرهاد زیرەک لە وەڵامدا ڕایگەیاند، "ئەو  وازی لە کاری هونەری هێناوە و بەرهەمی نییە".

 

باکگراوند: فەرهاد عەلی تەها، ناسراو بە فەرهاد زیرەک، لە ساڵی 1961 لە شاری هەولێر لە خێزانێکی هەژار و کوردپەروەر لە دایکبووە، فەرهاد زیرەک خاوەنی سەدان گۆرانییە و یەکێکە لەو هونەرمەندانەی گوێگرێکی زۆری هەیە و بەشێكی زۆری گۆرانییەکانی لەلایەن هونەرمەندانی دیکەوە گوتراوەتەوە و بووەتە قوتابخانەیەک بۆ هونەرمەندە نوێیەکان.