یەکێتی شێوازی کارکردنی دەگۆڕێت و دەسەڵاتەکان لە دوو نووسینگەدا کۆدەکاتەوە

ئاڤا نیوز

لە کۆبوونەوەی دوێنێی ئەنجوومەنی سەرکردایەتی یەکێتی، دەنگ لەسەر ڕاسپاردە و بڕیارەکانی دیداری یەکێتی درا، هەموو دەسەڵاتێک گوازراوەتەوە سەر نووسینگەی بافڵ تاڵەبانی و قوباد تاڵەبانی، بڕیاری هەڵوەشاندنەوەی چوار مەکتەب و دەیان مەڵبەند و کۆمیتەش دراوە.

وێنە گەورەکە: لە ماوەکانی ڕابردوودا یەکێتی بۆ گۆڕینی شێوازی حیزبایەتی لە شارەکانی کوردستان چەند دیدارێکی کرد و دواهەمینیان کۆتایی هەفتەی ڕابردوو بوو. دواتر بڕیار و ڕاسپاردەکانیان بەرزکردەوە بۆ کۆبوونەوەی ئەنجوومەنی سەرکردایەتی، لەوێش بڕیار لەسەر چەند گۆڕانکارییەک دراوە.

زانیاریی بەدەستهاتوو: ئاڤا زانیویەتی، ئامانج لە کەمکردنەوەی مەڵبەندەکان جگە لە کەمکردنەوەی خەرجی لەسەر حیزبەکە، زیادکردنی دەسەڵاتەکانی هەردوو مەکتەبی بافڵ تاڵەبانی و قوباد تاڵەبانییە.

بەپێی زانیارییەکانی ئاڤا، بەشێک لە بڕیارەکانی کۆبوونەوەی ئەنجوومەنی سەرکردایەتی یەکێتی ئەمانەن:

٠ بڕیار درا بەشێکی مەڵبەندەکان هەڵبووەشێننەوە وەک ئەوانەی ڕۆژهەڵاتی کەرکووک و چەمچەماڵ و قەرەچوغ و شارەزوور.

٠ لە کۆی 188 کۆمیتە 80 بۆ 86 کۆمیتە دەهێڵنەوە، چوار مەکتەبیش هەڵدەوەشێننەوە، جارێ بەتەواوەتی ڕوون نییە کام مەکتەبانە دەبن.

٠ هەموو پارێزگا و ئیدارە سەربەخۆکان مەڵبەندیان دەبێت و مەڵبەند لە هیچ قەزایەک نامێنێت جگە لە کۆیە، تەنیا تایبەتمەندی دراوەتەوە کۆیە و ئەم مەڵبەندەیان دەمێنێتەوە.

٠ لەمەودوا یەکێتی کارەکانی بانگەشە و حیزبایەتی زیاتر لە سۆشیال میدیا دەکات. واتا لە بری ئەوەی خەڵک لە بارەگاکاندا کۆبکەنەوە لە سۆشیال میدیا بانگەشەی هەڵبژاردن بکەن، ئامادەکاری تەواویش بۆ ئەمە کراوە.

٠ هەموو مەکتەب و مەڵبەند و کۆمیتەکان کەمترین پارەیان بۆ دابین دەکرێت، دەبێت خۆیان بەشی زۆری مەسرەفی خۆیان بکەن، کۆمەڵێک بارەگاش هەیە دەبێت چۆڵ بکرێن.

٠ ئەو ئەندامانەی سەرکردایەتیی کە زیاتر لە ئۆتۆمبیلێکیان لایە، تەنیا یەک ئۆتۆمبێلیان لا دەمێنێتەوە و ئەوانی تریان لێ وەردەگیرێتەوە.

ئەمەش بزانە: لە بڕیارێکی دیکەدا، کاروان گەزنەیی کراوەتە وتەبێژی سەرۆکی یەکێتی، لەمەودوا شتێک بە ناوی وتەبێژی یەکێتی نەماوە.