جەی دی ڤانس: بەردەوامی جەنگی ڕووسیا و ئۆکراینا دەبێتە هۆی هەڵگیرسانی جەنگی ئەتۆمی

ئاڤا نیوز

 

جێگری سەرۆکی ئەمریکا هۆشداری دەدات لە ئەگەری بەردەوامیی جەنگی نێوان ڕووسیا و ئۆکراینا، جەنگی ئەتۆمی بەرپا دەبێت.

 

وێنە گەورەکە: ملیۆنان سەرباز و هاووڵاتی مەدەنی قوربانیی جەنگێکی وێرانکەرن کە زیاد لە سێ ساڵە لە نێوان ڕووسیا و ئۆکراینا بەرپا بووە و بەردەوامی جەنگەکە وەک قەیرانێکی کوشندە بەرۆکی هەردوو وڵات و جیهانی گرتووە، لەگەڵ هەوڵەکانی دۆناڵد ترەمپ، سەرۆکی ئەمریکا بۆ کۆتاییهێنان بە جەنگەکە جەی دی ڤانس، جێگری سەرۆکی ئەمریکا هۆشداری دەدات لە هەڵگیرسانی جەنگی ئەتۆمی.

 

لێدوانی فەرمی: جەی دی ڤانس، جێگری سەرۆکی ئەمریکا لە چاوپێکەوتنێکی ڕۆژنامەوانیدا ئەمڕۆ سێشەممە ڕایگەیاند: جەنگی نێوان ڕووسیا و ئۆکراینا جەنگێکی وێرانکەرە و بەردەوامی جەنگەکە بۆ چەند ساڵێکی دیکە دەبێتە هۆی داڕمانی ژێرخانی ئابووری هەردوو وڵات و هێزی سەربازیی ڕووسیا تووشی شکستی گەورە دەبێت، لە ئەگەری بەردەوامی جەنگەکە ڤلادیمێر پووتین، سەرۆکی ڕووسیا بە ناچاری بڕیاری بەکارهێنانی چەکی ئەتۆمی دەدات.

 

زانیاریی زیاتر: جەی دی ڤانس، جێگری سەرۆکی ئەمریکا لە درێژەی وتەکانیدا گوتی، بۆ ئەوەی جیهان تووشی کارەساتی جەنگی ئەتۆمی نەبێت، سەرۆک ترەمپ بەردەوامە لە هەوڵەکانی بۆ بەدیهێنانی ئاشتی و ڕاگەیاندنی ئاگربەستی هەمیشەیی و گشتگیر، ڕووسیا و ئۆکراینا بە واژۆکردنی ڕێککەوتنامەی ئاشتی، مەترسییەکان کۆتاییان دێت و قۆناغێکی نوێ لە جیهان دەست پێدەکات.