گەنجێکی کوردی ئێزدی دوای 10 ساڵ لەدەستی داعش ڕزگاری دەبێت

ئاڤا نیوز 

 

گەنجێکی کوردی ئێزدی دوای 10 ساڵ لەژێر دەستی داعش ڕزگاری دەبێت و دەگەرێتەوە نێو خانەوادەکەی. 

 

چیرۆکی سەرەکی: ساڵی 2014 چەکدارانی ڕێکخراوی داعش، دیار عەلی ڕەبۆ و هەشت كەسی دیكەی خانەوادەكەی كە باوک و دایک و خوشک و برای بوون، کاتێک تەمەنی 11 بۆ 12 ساڵ بووە، لەلایەن داعشەوە لە شنگال دەڕفێنرێن، دەگوازرێنەوە بۆ تەلەعفەر و پاشانیش مووسڵ.

دواتر کاتێک دیار گەورە بووە، بە زۆرەملێ دەكرێت بە چەكداری داعش و دەخرێتە نێو ڕاهێنانی سەربازییەوە و دەیبەن بۆ سووریا، دوای ئەوەی بە زۆرەملێ بەشداریی پێدەكرێت لە شەڕی سەخت، قاچ و چاوێكی لەدەست دەدات.

دوای چەند ساڵێك مامێكی دیار كە ناوی جیهان شنگالییە كاتێك دەزانێت دیار لەژیاندا ماوە بە پارە و واستە و دیار ڕزگار دەكات. 

لێدوانی فەرمی: دیار باسی چیرۆكەكەی خۆی بۆ ئاڤا میدیا دەكات و دەڵێت، چەندین جار هەوڵم دەدا هەڵبێم و خۆم ڕزگاربكەم، بەڵام هەموو جارێك دەگیرامەوە و ئەشكەنجەیەكی زۆریان دەدام، سێ ساڵ لەنێو داعش ماومەتەوە و بردرابووم بۆ دێرەزوور و دواجار لە منبج بووم پێش ئەوەی ڕزگار بكرێم، ئەوە بۆ دە مانگ دەبێت ڕزگاری بووە و لە كۆمەڵگەی شاریایە.

 

دەشڵێت، هەموو ساتەکانی ژیانی ئەو چەند ساڵەم لەپێش چاوە و لەبیركردنی ئەستەمە، زۆر ترسم لە كامێرایە، چونكە كاتێک لە زیندان بووم كامێرایان دەهێنایە ژوورێ و لەبەر چاوی كامێرا ئەشكەنجە دەدرام.

هەر بەو هۆیەوە ئێستا دیار زۆر كامێرا دەترسێ، كاتێك كامێرامان بردە بەردەمی زۆر ترسا و دەستی كرد بە گریان و گوتی هەموویم هاتەوە بەرچاو.

لە لایەکی دیکەوە: بەپێی گوتەی مامی دیار، لەبەرامبەر ئازاد كردنی برازاكەی 15 هەزار دۆلاری داوە، تاوەكوو ئێستا دوو برا و دوو خوشك لەو خانەوادەیە رزگاریان بووە، ڕووفاتی باوكی دۆزراوەتەوە و تاوەکو ئێستاش چارەنووسی دایکی و خوشكێكی نادیارە.

قسەی كۆتایی مامی دیار ئەوەیە دەڵێ ئامادە چەندم خەرج كردووە بۆ ڕزگاركردنی برازاكەم چەند هێندەی دیكەش خەرج بكەم بۆ ئەوەی قاچی و چاوی دیار چاك بێتەوە و لە دۆخە ناخۆشەی ئێستای دەربچێت.