سوودانی لە ڕۆژی جیهانیی کرێکاران: مافەکانیان بە یاسا گەرەنتی دەکەین

ئاڤا نیوز

 

سەرۆکوەزیرانی عێراق لە ڕۆژی جیهانیی کرێکاراندا دەڵێت، لەڕێگەی کاراکردنی یاسای خانەنشینیی و دەستەبەری کۆمەڵایەتییەوە، مافە یاسایی و داراییەکانی کرێکاران گەرەنتی دەکەن، چونکە ئەوان بناغەی ئاوەدانیی و بوژانەوەی وڵاتن.

 

ئەوەی پێویستە بیزانیت: 1ی ئایار لە زۆرینەی وڵاتانی جیهان وەک ڕۆژی کرێکاران دیاریکراوە و لەو ڕۆژەدا حکومەتەکان و کۆمپانیاکانی کەرتی تایبەت ڕۆڵی کرێکاران لە بونیادنانەوە و ئاوەدانیدا بیر دەهێننەوە، هاوکات ئەم ڕۆژە دەرفەتێکیشە بۆ جەختکردنەوە لەسەر پاراستنی مافەکانیان.

 

لێدوانی فەرمی: محەممەد شیاع سوودانی، سەرۆکوەزیرانی عێراق لە پەیامەکەیدا پیرۆزبایی لە کرێکاران دەکات و دەڵێت، پێداگرن لەسەر جێبەجێکردنی کارنامەی حکومەت بۆ گەرەنتیکردنی مافەکانی کرێکاران، بەجۆرێک ژینگەیەکی خۆشگوزەران و داهێنانیان بۆ دەستبەربکات و مافە یاسایی و داراییەکانیشیان پارێزراو بێت.

 
- ئاماژەی بەوەشکردووە، بە پێداگریی عێراقییەکان بۆ بونیادنانی وڵاتەکەیان و گەشەپێدانی، کاروانی کار و ئاوەدانی ناوەستێت، ئەوەش دەرفەتی گەشەپێدان و هەلی کار نوێ دەڕەخسێنێت و دەرگای نوێی چالاکی ئابووری و پیشەسازییش دەهێنێتە ئاراوە.