شارەوانی هەڵەبجە داوای شایستەی دارایی 233 پارچە زەوی دەکات

ئاڤا نیوز

 

شارەوانی هەڵەبجە بە نووسراوێکی فەرمی داوای گرتنەبەری ڕێککاری یاسایی دەکات بۆ بەدەستهێنانی شایستەی دارایی بەرامبەر ئەو زەوییانەی لەلایەن فەرمانگەکانی حکومەتەوە بەکاردەهێنرێن یان دەستیان بەسەردا گیراوە.

 

چیرۆکی سەرەکی: لە سنووری پارێزگای هەڵەبجە بەشێک لە زەوییەکانی شارەوانی لە ساڵی 1991ـەوە لەلایەن فەرمانگەکانی حکومەتەوە بەکاردەهێنرێن و تا ئێستا هیچ بڕە پارەیەک لەو زەوییانە نەدراوە بە شارەوانی هەڵەبجە کە ژمارەیان 233 پارچە زەوییە. ئەمەش بەپێی ئەو نوسراوەی شارەوانی هەڵەبجە بڵاویکردوەتەوە.

 

لێدوانی فەرمی: سەلام بیلال، سەرۆکی شارەوانی هەڵەبجە بە ئاڤا میدیای وت، بەشێک لەو زەوییانە مزگەوت یان قوتابخانەیان لەسەر دروستکراوە کەچی هەر بەناوی شارەوانییە. بەشێکی دیکە لەو زەوییانە داگیرکراون و بۆ مەبەستی تر بەکاردێن. هەڵەبجە تازە بووەتە پارێزگا و پێویستی بە خزمەتگوزاری هەیە بۆ پێویستە مامەڵەی دارایی ئەو زەوییانە وەربگیرێن.

 

- سەرۆک شارەوانی هەڵەبجە ئەوەش دەڵێت: هەر زەوییەک بفرۆشرێت 100%ـی بۆ پڕۆژەی خزمەتگوزاریی شاری هەڵەبجەیە و ڕ‌ێککاریی یاسایی بەرامبەر هەمووان دەگرینەبەر بۆ یەکلاییکردنەوەی دۆسیەکانیان.

باکگراوند: ڕۆژی 14ـی مانگی نیسانی ئەمساڵ پەرلەمانی عێراق دەنگیدا لەسەر بە پارێزگابوونی هەڵەبجە. دوو هەفتە دواتر ڕۆژی 29-4 سەرۆک کۆماری عێراق واژۆی لەسەر یاساکە کرد، ئەوەی ماوەتەوە لە ڕۆژنامەی "وەقائیعی عێراق" بڵاوبکرێتەوە و بچێتە بواری جێبەجێکردن.