عێراق: دەستدرێژییەکانی ئیسرائیل بۆ سەر سووریا ڕەتدەکەینەوە

ئاڤا نیوز

وەزارەتی دەرەوەی عێراق، هێرشەکەی ئیسرائیل بۆ سەر ناوچەیەکی دەوروبەری کۆشکی سەرۆککۆماری سووریا سەرکۆنە دەکات و دووپاتی دەکاتەوە هەموو جۆر دەستدرێژییەکی ئیسرائیل بۆ سەر ئەو وڵاتە ڕەتدەکەینەوە.

چیرۆکی سەرەکی: لە دوو ڕۆژی ڕابردوودا، ئیسرائیل بۆ جاری دووەم بۆردوومانی دیمەشقی کرد و ئەمجارە فڕۆکە جەنگییەکانی ئەو وڵاتە ناوچەیەکی نزیک لە کۆشکی سەرۆکایەتیی سووریایان کردووەتە ئامانج "لە بەرامبەر بەرگریکردن لە پێکهاتەی درووز".

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا سەرۆکۆنەی هێرشەکەی ئیسرائیلی کرد و ڕایگەیاند: بە تەواوی هەموو جۆرە دەستدرێژییە بەردەوامەکانی ئیسرائیل بۆ سەر سەروەریی سووریا ڕەتدەکەینەوە.

ئەوەی پێویستە بیزانیت: لە ڕۆژانی ڕابردوو، شەڕ لەنێوان چەکدارانی درووز لەلایەک و چەکدارانی سەر بە دەسەڵات و هێزەکانی ئاسایشی وەزارەتی ناوخۆ لەلایەکی دیکە ڕووی دا لە شارۆچکەکانی جرمانە و سەحنایە لە پارێزگای ڕیفی دیمەشق و لە چەند ناوچەیەکی شاری سوەیدا لە سووریا، لە ئەنجامدا 100 کەس گیانیان لەدەستدا و 11ـیان هاووڵاتی سڤیل بوون.