8ـی ئایار یەکەم کاروانی حاجیان بەرەو سعودیە بەڕێدەکەوێت

ئاڤا نیوز

وەزارەتی گواستنەوەی عێراق کۆتاییهاتنی سەرجەم ئامادەکارییەکانی بۆ گواستنەوەی حاجییان ڕاگەیاند و ئاماژە بۆ ئەوە دەکات یەکەم کاروانی حاجیان ڕۆژی پێنجشەممە 8ـی ئایار دەستپێدەکات و ڕۆژانە پێنج گەشتی ئاسمانی بۆ گواستنەوەی حاجییان ئەنجام دەدەن.

 

چیرۆکی سەرەکی: ساڵانە لە وەرزی حەجکردن، لەسەر ئاستی جیهان بە سەدان هەزار کەس بە مەبەستی بەجێگەیاندنی فەریزەی حەج ڕوو لە شاری سعودیە دەکەن. 

 

ڕاگەیێنراوی فەرمی: بەگوێرەی ڕاگەیێنراوی وەزارەتی گواستنەوەی عێراق، ئامادەکارییەکان بۆ گواستنەوەی حاجیانی عێراقی بە ڕێگای ئاسمانی تەواو بوون، ڕۆژی 8ـی ئایار یەکەم گەشتی حاجیان دەستپێدەکات.

 

- وادەی دەستپێکردنی یەکەم گەشتی گواستنەوەی حاجیانی عێراق لەلایەن کۆمپانیای گشتیی هێڵی ئاسمانیی عێراقییەوە، ڕۆژانە پێنج گەشت ئەنجام دەدرێن و پرۆسەی گواستنەوەی ئاسمانی تاوەکو ڕۆژی 28ـی ئایار بەردەوام دەبێت.

 

لەلایەکی دیکەوە: پێشتر کاروان ستوونی، وتەبێژی بەڕێوەبەرایەتیی حەج و عومرەی کوردستان بە ئاڤا میدیای ڕاگەیاندبوو، "ناوەڕاستی مانگی پێنج، یەکەم کاروانی حاجییانی کوردستان بەرەو سعودیە بەڕێدەکەوێت.

 

ئەوەی پێویستە بیزانیت: ئەمساڵ لە هەرێمی کوردستانەوە، پێنج هەزار و 120 کەس سەردانی ماڵی خودا دەکەن بە مەبەستی بەجێگەیاندنی فەریزەی حەج و دەبن بە حاجی.