ترەمپ: ئەگەر ئێران چەکی ئەتۆمی هەبێت جیهان لەناو دەچێت

ئاڤا نیوز

 

سەرۆکی ئەمریکا هەڵوێستی نوێی وڵاتەکەی لەبارەی دانوستاندنەکانی بەرنامەی ئەتۆمی لەگەڵ ئێران دەخاتەڕوو و دەڵێت، "نابێت ئێران چەکی ئەتۆمی هەبێت."

 

چیڕۆکی سەرەکی: ئەمریکا و ئێران سێ جار گەڕی دانوستاندنیان بۆ پرسی ئەتۆمی ئەنجامداوە، گەڕی یەکەم لە عومان و گەڕی دووەم لە ڕۆما، سێیەم گەڕیش دووبارە لە عومان بەڕێوەچوو، هەردوولا کۆبوونەوەکانیان  بە "ئەرێنی" و بەرهەمدار وەسف کردووە.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، ''من دەمەوێت ئێران بەڕاستی سەرکەوتوو، گەورە و خەیاڵیی بێت، تاکە شتێک کە ناتوانن هەیانبێت: چەکی ئەتۆمییە، چونکە جیهان لەناودەچێت''.

 

ئەوەی لەبارەیەوە دەگوترێت: ئێران لە کاتی دانووستاندنەکانی بە ڕوونی باسی لەوە کرد کە هەڵوەشاندنەوەی تەواوی بەرنامە ئەتۆمییەکەی قبوڵ ناکات.

 

زانیاریی بەدەستهاتوو: ئاکسیۆس ئاشکرای دەکات ''بڕیارە لە کۆتایی ئەم هەفتەیەدا دانوستاندنکارانی ئەمریکا و ئێران بۆ چوارەمین جار لەبارەی بەرنامە ئەتۆمییەکەی تاران کۆببنەوە."

 

گومانەکان: ئەنجامدانی گەڕی چوارەمی دانوستاندنەکان مشتومڕی زۆرە لەسەرە، تاوەکو ئێستا لایەن وەزارەتی دەرەوەی هەردوو وڵات وادەی دانیشتنی داهاتوو ڕانەگەیێنراوە.