پسپۆڕێکی ژینگە: ئەمساڵ زۆرترین دیاردەی خۆڵبارین ڕوودەدات

ئاڤا نیوز

پسپۆڕێکی ژینگە هۆشداری لە خراپی دۆخی ژینگەی عێراق دەدات و دەڵێت: بەپێی داتاکان ئەمساڵ بۆ ڕێژەی کەمبارانی خراپترین ساڵ بووە و دیاردەی خۆڵبارین زیاد دەکات.

وێنە گەورەکە: جیهان ڕووبەڕووی گۆڕانکاری خێرای کەشوهەوا دەبێتەوە، چەند ساڵێکە ئەو گۆڕانکارییە لەسەر عێراق بە تەواوی دەرکەوتووە. بەدیاریکراوی ئەمساڵ کەمی ڕێژەی بارانبارین لێکەوتەکانی دەرکەوتوون.

لێدوانی فەرمی: د.ڕێبەر مزوری، پسپۆڕی ژینگە و مامۆستای زانکۆ بە ئاڤا میدیای وت، لەمێژووی 25 ساڵی ڕابردوودا هەرگیز کەمبارانی بەو ئاستە تۆمار نەکراوە. ساڵی 2024 بۆ 2025 خراپترین ساڵی مێژووی سەدەی ڕابردووی عێراق بووە. ئەمەش وا دەکات دیاردەی خۆڵبارین بە درێژایی وەرزی هاوین بەردەوام بێت.

- ئەو خۆڵبارینەی ئێستا ڕووی لە هەرێمی کوردستان کردووە، پەیوەندی هەیە بە کەمبوونەوەی ئاستی شێ لە بیابانەکان، هەر کاتێک بایەکی بەهێز لە بیابانەکان بدات ئەو تۆز و خۆڵە بە زوویی دیاردەی خۆڵبارین دروست دەکات و دەگاتە کوردستان.

- بەپێی بنەمای زانستی، "بەگوێرەی شوێن" لە 400 ملیم کەمتر باران ببارێت، ئەو ناوچەیە وشکە ساڵی دەبێت.

لەلایەکی دیکەوە: لەبارەی بەردەوامی خۆڵبارینی ئەم چەند ڕۆژە سیروان ساڵح، شارەزای کەشناسی دەڵێت: بڕێکی باش هەوری کەڵەکە لە ناوچەکانی کەرکووک، تکریت و ئەنبارەوە بەرەو هەرێمی کوردستان و بەشێکی ناوچەکانی گەرمیان بەڕێوەیه، ئەمشەو ئەگەری بڕێکی کەم باران و هەورە بروسکە هەیەو خۆڵبارینیش بەنیوە کەم دەبێتەوە، سبەی کاریگەری پەستان نزمی خەماسینی بەتەواوی کۆتایی دێت و بەهاتنی هەوایەکی تاڕادەیەک فێنک لە تورکیاوە خۆڵبارین ڕادەماڵێت و لە پاش نیوەڕۆی سبەینێ سێشەممە بەتەواوی ئاسمان پاک دەبێتەوه.

باکگراوند: ئەمڕۆ دووشەممە، خۆڵبارینێکی چڕ چەند ناوچەیەکی عێراق و هەرێمی کوردستانی گرتەوە، تا ئێوارەی ئەمڕۆ بە تەنیا لە کەرکووک بە هۆی خۆڵبارینەوە 94 کەس ڕەوانەی نەخۆشخانە کراون.