خواست لەسەر گۆشتی سوور لە بازارەکانی هەرێمی کوردستان کەمدەبێتەوە

ئاڤا نیوز

دوای تەشەنەکردنی نەخۆشی تای خوێنبەربوون لە عێراق و تۆمارکردنی حاڵەتەکە لە کەرکووک و کۆیە، ڕێکاری تووند لە هەرێمی کوردستان بۆ ڕێگری لە بڵاوبوونەوەی نەخۆشییەکە گیراوەتەبەر، ئەمەش کاریگەری لەسەر بازاڕی گۆشتی سوور دروستکردووە.

وێنە گەورەکە: وەزارەتی تەندروستی چەندین ڕێنمایی بڵاوکردووەتەوە بۆ ئەوەی هاووڵاتییان پارێزراو بن لە نەخۆشی تای خوێبەربوون، چاودێری تووندیش بەرامبەر گۆشتفرۆشەکان گیراوەتەبەر، بەو هۆیەوە خواست لەسەر گۆشتی ئاژەڵ کەمبووەتەوە.

لێدوانی فەرمی: هەڵمەت هەمزە، بەڕێوەبەری سەربڕخانەی هەولێر، بە ئاڤا میدیای ڕاگەیاند، بڵاوبوونەوەی نەخۆشی تای خوێنبەربوون خواستی لەسەر گۆشتی سوور کەمکردۆتەوە، بەهۆیەوە لە سەربڕخانەی هەولێر خواست لەسەر سەربڕینی ئاژەڵ کەمبووەتەوە.

زانیاریی زیاتر: پێش تۆمارکردنی یەکەم تووشبوو بە تای خوێنبەربوون لە کەرکووک، ڕۆژانە زیاتر لە 800 سەر ئاژەڵی گەورە و بچووک لە سەربڕخانەی هەولێر سەردەبڕدران، بەڵام ئێستا کەمبووەتەوە بۆ نزیکەی 700 سەر ئاژەڵ، ئەگەر نەخۆشییەکە بەردەوام بێت و تووشبووی دیکە تۆماربکرێت، خواست زۆر کەمتر دەبێت لەسەر گۆشتی سوور ئەمەش کاریگەری لەسەر ئاژەڵداران و بازاڕ دروست دەکات.

لەلایەکی دیکەوە: بەڕێوەبەری سەربڕخانەی هەولێر دەڵێت: تای خوێنبەربوون پەیوەندی بە نزیکبوونەوەی جەژنی قوربانەوە نییە، بەڵکو لەگەڵ هاتنی وەرزی گەرما بڵاودەبێتەوە.

ئەوەی پێویستە بیزانیت: لە سەربڕخانەی هەولێر، ئاژەڵ پێش و پاش سەربڕینی، بە چەندین فلتەردا دەڕوات و وەزارەتی تەندروستی کەرەستەی پێویستی بۆ سەربڕخانەکان دابین کردووە.