ترەمپ: یارمەتی خەڵکی غەززە دەدەین بۆ ئەوەی بڕێک خۆراکیان دەست بکەوێت

ئاڤا نیوز

 

ئیدارەی دۆناڵد ترەمپ، سەرۆکی ئەمریکا دووپاتیدەکاتەوە، هاوکار دەبێت لە دابینکردنی خۆراک بۆ خەڵکی غەززە.

 

وێنە گەورەکە: لە سەرەتای مانگی ئازارەوە و لەگەڵ دەستپێکردنەوەی هێرشەکانی ئیسرائیل بۆ سەر کەرتی غەززە، ڕێگری لە چوونەژوورەوەی هەموو هاوکارییەکی مرۆیی  و پێداویستی سەرەتایی لەلایەن ئیسرائیلەوە بۆ ناو کەرتەکە کراوە، بە بیانووی ئەوەی حەماس ئەم "پێداویستیانە وەک سەرچاوەیەکی دارایی بۆ خۆی بەکاردەهێنێت"، بەهۆیەوەش دۆخی مرۆیی کەرتە ڕۆژ بەڕۆژ خراپتر دەبێت.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، ''ئێمە یارمەتیی خەڵکی غەززە دەدەین بۆ ئەوەی بڕێک خۆراکیان دەست بکەوێت، خەڵکی غەززە لەلایەن حەماسەوە خراپ مامەڵەیان لەگەڵدا دەکرێت و حەماس هەموو ئەو شتانەی کە دەهێنرێتە ژوورەوە بۆ غەززە بۆخۆیانی دەبەن''.

 

لەلایەکی دیکە: ئەم لێدوانەی ترەمپ لە کاتێکدایە، ئیسرائیل پلانێکی پەسەندکرد بۆ فراوانکردنی ئۆپەراسیۆنەکان لە غەززە.

 

قووڵتر: جێبەجێکردنی پلانەکەی ئیسرائیل بۆ غەززە بریتیی دەبێت، لە جێگیرکردنی دەیان هەزار سەربازی یەدەگ بۆ فراوانکردنی هێرشەکان، داگیرکردنی تەواوەتی کەرتی غەززە بۆ ئازادکردنی بارمتە ئیسرائیلییەکان لەگەڵ گواستنەوەی فەڵەستینییەکان لە باکوورەوە بۆ باشووری کەرتەکە.