حەماس: لەکاتێکدا غەززە برسی دەکرێت دانوستاندن بێ مانایە

ئاڤا نیوز

 

بزووتنەوەی حەماس هەموو دانوستاندنێک لەگەڵ ئیسرائیل لە بەردەوامی پەیڕەوکردنی "سیاستی برسیکردن" لە کەرتی غەززە بە بێ مانا و بێ سوود وەسف دەکات.

 

وێنەگەورەکە: ماوەی چەند مانگێکە حکومەتی ئیسرائیل ڕێگە بە هاتنەناوەوەی هیچ هاوکارییەکی مرۆیی بۆ ناو کەرتی غەززە نادات و جگە لە بۆردوومان کردنی بەردەوام, "سیاسەتی بریسکردن"ـیش دژی هاووڵاتیانی کەرتی غەززە بەرکاردەهێنێت، ئەمەش کاردانەوەی نێودەوڵەتی بەدوای خۆیدا هێناوە.

 

لێدوانی فەرمی: بەسام نەعیم، ئەندامی مەکتەبی سیاسیی حەماس ڕایگەیاند: "هەر دانوستاندنێکی ئاگربەست لە ژێر ڕۆشنایی پەیرەوکردنی سیاسەتی برسیکردن لەلایەن  ئیسرائیل لە کەرتی غەززە، بێ مانایە و سوودی نییە". بەسام نەعیم داواش لە "کۆمەڵگەی نێودەوڵەتی دەکات فشار بخاتە سەر حکومەتی ئیسرائیل بۆ ڕاگرتنی شەری برسیکردن".

 

ئەوەی پێویستە بیزانیت: دوێنێ ڕۆژی دووشەممە، حکومەتی ئیسرائیل پێشنیازی  فراوانکردنی ئۆپەراسیۆنە سەربازییەکانی لە کەرتی غەززە پەسەند کرد و بڕیارە لە دوای سەردانەکەی دۆناڵد ترەمپ بۆ ڕۆژهەڵاتی ناوەڕاست جێبەجێی بکات.

 

ئەوەی لەبارەیەوە دەگوترێت: ژان نۆئێل بارۆت، وەزیری دەرەوەی فەرەنسا بەتوندی ئیدانەی پلانەکەی ئیسرائیلی کرد و  بە پێشێلکردنی جارنامەی نێودەوڵەتیی  مافی مرۆڤی دانا.