کەشناسیی عێراق: شەپۆلی خۆڵبارین لە چەند ڕۆژی داهاتوودا زیاتر دەبێت

ئاڤا نیوز

 

دەستەی کەشناسیی عێراق دەڵێت، ئەو شەپۆلی خۆڵبارینەی عێراقی گرتووەتەوە لە چەند ڕۆژی داهاتوودا زیاتر دەبێت.

 

وێنە گەورەکە: ماوەی چەند ڕۆژێکە شەپۆلێکی چڕی خۆڵبارین چەند پارێزگایەکی عێراق و هەرێمی کوردستانی گرتووەتەوە، بەهۆیەوە مەودای بینین کەم بووەتەوە و سەدان هاووڵاتی تووشی هەناسەتەنگی بوون و بەشێکی زۆریان ڕەوانەی نەخۆشخانە کراون.

 

ڕاگەیێنراوی فەرمی: بەگوێرەی دەستەی کەشناسیی عێراق، خۆڵبارین لە سێ ڕۆژی داهاتوودا لە شارەکانی عێراق زیاتر دەبێت و بەو هۆیەشەوە پلەکانی گەرما بەرز دەبنەوە.

 

کاریگەریی و لێکەوتەکان: بەگوێرەی ڕوانگەی عێراقی سەوز، بەهۆی کاریگەریی شەپۆلی خۆڵبارین ڕۆژانە عێراق ملیۆنێک دۆلار زیان دەکات.

 

زانیاریی زیاتر: د.ڕێبەر مزوری، پسپۆڕی ژینگە و مامۆستای زانکۆ پێشتر بە ئاڤا میدیای ڕاگەیاندبوو، لە 25 ساڵی ڕابردوودا ئاستی بارانبارین وەکو ئەمساڵ کەم نەبووە و ئەمەش وا دەکات دیاردەی خۆڵبارین بە درێژایی وەرزی هاوین بەردەوام بێت.

 

لێدوانی فەرمی: سامان یابە، گوتەبێژی تەندروستیی کەرکووک بە ئاڤای گوت، "بەگوێرەی دوایین ئاماری بەردەست 207  کەس بەهۆی کاریگەری ئەم شەپۆلە تەندروستیان تێکچووە و گەیێنراونەتە نەخۆشخانەکانی کەرکووک و دوای وەرگرتنی چارەسەر ڕەوانەی ماڵەوە کراونەتەوە."

 

لەلایەکی دیکە: دوایین ئاماری سەردانیکەرانی نەخۆشخانەکان بەهۆی خۆڵبارین لە پارێزگاکانی هەرێمی کوردستان بەمشێوەیە:-

هەولێر: 12 کەس.
سلێمانی: 10 کەس.
هەڵەبجە: 14 کەس.

 

ئەوەی پێویستە بیزانیت: حکومەتی هەرێمی کوردستان لەپێناو پاراستنی تەندروستیی هاونیشتمانیان چەند ڕێنماییەکی بڵاوکردووەتەوە و داوا  دەکات، بۆ کاری زۆر پێویست نەبێت لە ماڵەکانیان نەچنە دەرەوە.