وەزیری ناوخۆی عێراق: هەڵوێستی خۆی لەبارەی دەستبەرکردنی ژیانی شەرع ئاشکرا دەکات

ئاڤا نیوز

ئەحمەد شەرع، سەرۆکی سووریا بە فەرمی بۆ بەشداریکردن لە لووتکەی عەرەبی لە بەغدا بانگهێشت کراوە و دەسەڵاتدارانی سووریاش گەرەنتی پاراستنی سەلامەتی گیانی سەرۆکەکەیان دەوێت، وەزیری ناوخۆی عێراقیش دەڵێت، هیچ داوایەکی فەرمیمان لە دیمەشقەوە بۆ نەهاتووە.

چیرۆکی سەرەکی: ڕۆژی 17ـی ئەم مانگە، عێراق میوانداری کۆبوونەوەی لووتکەی عەرەبی لەبەغدا دەکات، وێڕای ناکۆکییە سیاسییەکان لە بەشداریکردنی ئەحمەد شەرع، حکومەتی عێراق بە فەرمی وەک سەرۆککۆماری سووریا بانگهێشتی لووتکەکەی کردووە.

لێدوانی فەرمی: ئەمڕۆ سێشەممە 6-5-2025، عەبدولئەمیر شەممەری، وەزیری ناوخۆی عێراق ڕایگەیاند: هیچ شاندێکی سووریا بۆ مسۆگەرکردنی سەردانەکەی ئەحمەد شەرع و دەستەبەرکردنی ژیانی لە کاتی بەشداریکردنی لە لووتکەی وڵاتانی عەرەبی لە بەغدا، پەیوەندییان بەدەسەڵاتدارانی عێراقەوە نەکردووە.

ئەمەش بزانە: بانگهێشتکردنی شەرع کاردانەوەی لایەنە سیاسی و گرووپە چەکدارەکانی سەر بە ئێرانی بەدوای خۆیدا هێناوە، چونکە شەرع پێشتر لەلایەن دەسەڵاتی دادوەریی عێراقەوە فەرمانی دەستگیرکردنی هەبووە.