سێ توێژ بۆ دەرهێنانی کارتی نیشتمانی ئاسانکارییان بۆ دەکرێت

ئاڤا نیوز

فۆڕمی خۆراک بە ئەلیکترۆنی دەکرێت و هەبوونی کارتی نیشتمانی کراوەتە مەرج بۆ نوێکردنەوەی فۆڕمەکە، لە هەرێمی کوردستان هەزاران کەس کارتی نیشتمانیان نییە و تەواوبوونی مامەڵەکەش بەلایەنی کەمەوە 10 ڕۆژ دەخایەنێت.

وێنە گەورەکە: دوای 28 ساڵ فۆڕمی خۆراک گۆڕانکاری بەسەردا دێت و بە ئەلیکترۆنی دەکرێت، لە ڕۆژانی داهاتوو پرۆسەکە لە پارێزگای هەڵەبجەوە دەستپێدەکات و لەماوەی دوو مانگدا سەرجەم خێزانەکانی هەرێمی کوردستان تۆماردەکرێن.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی، لە وەزارەتی بازرگانی و پیشەسازی حکومەتی هەرێمی کوردستان بە ئاڤای گوت، "لە فەرمانگەکانی کارتی نیشتمانی ئاسانکاری کراوە بۆ پیاوان و ئافرەتانی سەروو 60 ساڵ، منداڵانی ساوا و قوتابیانی پۆلی 12 کە بەبێ نۆرە مامەڵەی کارتی نیشتمانی بکەن، چونکە هەر کەسێک کارتی نیشتمانی نەبێت، لە فۆڕمی خۆراک بێبەش دەبێت."

زانیاریی زیاتر: دەبێت هەموو ئەندامانی خێزان کارتی نیشتمانییان هەبێت، ئەوانەی کە نیانە لە فۆرمەکە تۆمارناکرێن و دوای تەواوکردنی پرۆسەکە ناویان تۆماردەکرێت.

ئەمەش بزانە: پێنج ملیۆن و 350 هەزار کەس لە فۆڕمی خۆراک سوودمەند دەبن، هەزاران کەس کارتی نیشتمانیان نییە دەبێت ڕێکارەکانی دەرهێنانی بکەن.