وەزیری دەرەوەی ئازەربایجان: بەم زووانە کونسوڵخانە لە هەولێر دەکەینەوە

ئاڤا نیوز

وەزیری دەرەوەی ئازەربایجان ڕایگەیاند، لە بوارەکانی ئابووری، بازرگانی، گەشتیاری و دیپلۆماسیدا دەیانەوێت پەیوەندییەکانیان لەگەڵ عێراق و هەرێمی کوردستان پتەوتر بکەن، بۆ ئەو مەبەستەش بەم زووانە کونسوڵخانەی وڵاتەکەیان لە هەرێمی کوردستان دەکەنەوە.

وێنە گەورەکە: ئازەربایجان لە بەرهەمهێنانی غاز و هەناردەکردنیدا وڵاتێکی گرنگی ناوچەکەیە، ماوەی چەند ساڵێکیشە دەیەوێت پەیوەندییەکانی لەگەڵ عێراق و هەرێمی کوردستان پتەوتر بکات.

لێدوانی فەرمی: جەیهون بایرامۆڤ، وەزیری دەرەوەی ئازەربایجان لەگەڵ فوئاد حوسێن، هاوتا عێراقییەکەی کۆبووەوە، لە کۆنفرانسێکی ڕۆژنامەنوسیدا هاوبەشیشدا ڕایگەیاند، هەردوو وڵات بڕیاریانداوە لە هەماهەنگی و پێکەوە کارکردن بەردەوام بن.

لای خۆیەوە فوئاد حوسێن، وەزیری دەرەوەی عێراق ئاماژەی بەوەکرد، وەزیری دەرەوەی ئازەربایجان لە کۆبوونەوەکەدا ئاماژەی بە پێویستی کردنەوەی کونسوڵخانەی وڵاتەکەی لە هەولێر کرد و جەختی لەسەر کردەوە، لە قۆناغی داهاتووشدا چاودێریی ئەو بابەتە دەکەن ئەویش بە ئامانجی تەواوکردنی هەنگاوەکانی کردنەوەی کونسوڵخانەی ئازەربایجان لە هەولێر.

بەشێکی دیکە لە قسەکانی فوئاد حوسێن:

٠ لە هەوڵەکانمان بۆ فرەجۆرکردنی سەرچاوەکانی غاز بۆ بەرهەمهێنانی کارەبا تا قۆناغی خۆبژێویی بەردەوامین، کۆمپانیاکانی ئازەربایجان لەم بوارەدا دەتوانن هاوکارمان بن.

٠ لە بوارەکانی بەهێزکردنی کەرتەکانی گەشتیاریی، خوێندنی باڵا، گەشتی ئاسمانیی و ڕادەستکردنەوەی ژن و منداڵانی داعش لە پێکەوەکارکردن بەردەوام دەبین.