پارتی و یەکێتی: دەمانەوێت بە یەک لیست بەشداری لە هەڵبژاردن بکەین

ئاڤا نیوز

پارتی و یەكێتی دەیانەوێت هەموو لایەنە کوردستانییەکان لە ناوچە کوردستانییەکانی دەرەوەی ئیدارەی هەرێمی کوردستان بە یەک لیست بەشداری لە هەڵبژاردنی خولی شەشەمی پەرلەمانی عێراق بکەن.

وێنە گەورەکە: ڕۆژی یەکشەممە لە شاری هەولێر کۆبونەوەیەک لەنێوان مەکتەبی هەڵبژاردنی پارتی و دەزگای هەڵبژاردنی یەکێتی بەڕێوەچوو و گفتوگۆ لەسەر شێوازی بەشداریکردنی هەڵبژاردنی پەرلەمانی عێراق کرا، بۆ ئەوەی ئەگەر هیچ نەبێت لە ناوچە کوردستانییەکانی دەرەوەی ئیدارەی هەرێمی کوردستان بەیەک لیست بەشداری بکەن.

لێدوانی فەرمی: جەمال شوکور، بەرپرسی مەکتەبی پەیوەندییەکانی یەكێتی لە کەرکووک بە ئاڤای گوت، "دووجار سەردانی پارتیمان کردووە و لەسەر بیرۆکەی بەشداریکردنمان بە یەک لیست هەڵوەستە کراوە، بۆ ئەوەی هەمان سیناریۆی هەڵبژاردنی ئەنجوومەنی پارێزگای کەرکووک دووبارە نەبێتەوە و کورد هیچ کورسییەکی نەفەوتێت."

بۆچوونی لایەنی بەرامبەر: سامان ڕەشید، بەرپرسی بەشی هەڵبژاردنی پارتی دیموکراتی کوردستان لە کەرکووك بە ئاڤای ڕاگەیاند، "پێشنیازمان کردووە هەموو لایەنە کوردستانییەکان لە ناوچە کێشەلەسەرەکان بەیەک لیست بەشداری بکەن، نەک تەنها پارتی و یەکێتی پێکەوە لیستێکیان هەبێت."

ئەمەش بزانە: چەند ڕۆژێک پیش ئێستا قوباد تاڵەبانی، ئەندامی مەکتەبی سیاسی یەکێتی لە کۆنگرەیەکی ڕۆژنامەوانیدا گوتی، "باوەڕ ناکەم لەگەڵ پارتی بەیەک لیست بەشداری هەڵبژاردن بکەین."