دەنگدان بۆ هەڵبژاردنی پاپا بەردەوام دەبێت

ئاڤا نیوز

لە دووەم گەڕی هەڵبژاردن بۆ دیاریکردنی ڕابەری نوێی کاسۆلیکەکانی جیھان، پاپا هەڵنەبژێردرا. هەڵبژاردنەکە بە ئامادەبوونی 133 کاردیناڵ و لە کەنیسەی سیستین بەڕێوەچوو. هەر بۆیە دەنگدان بۆ هەڵبژاردنی پاپا بەردەوام دەبێت.

وێنە گەورەکە: لە 21ـی نیسان پاپا فرەنسيس، ڕابەری کاسۆلیکەکانی جیھان و سەرۆکی ڤاتیکان، کۆچی دوایی کرد. بە مەبەستی دیاریکردنی جێگرەوەی پاپا بۆ یەک ملیار و 400 ملیۆن کاسۆلیکی جیهان، ڕۆژی 2025-05-07، کەنیسەی کاسۆلیک دەستی کرد بە هەڵبژاردنی 267ـەمین پاپا لە مێژووی کەنیسەکەیدا.

زانیاریی زیاتر: لە دووەم گەڕی هەڵبژاردن کە لە نێوان 133 کاردیناڵدا بەڕێوەچوو، بە نیشانەی سەرنەکەوتنی پڕۆسەکە، دووکەڵی ڕەش لە کەنیسەی سیستین بەرزبوویەوە.

بە پێی نەریتی هەڵبژاردنی پاپا، لە ئەمڕۆوە ڕۆژانە چوار جار دەنگدان بۆ هەڵبژاردنی پاپای نوێی لە ناو کاردیناڵەکاندا دەکرێت تا ئەو کاتەی کە ڕابەری نوێی کاسۆلیکەکانی جیھان دیاری بکرێت.

ئەوەی پێشبینی دەکرێت: بەهۆی ئەوەی لە دوو گەڕی هەڵبژاردن، هیچ کام لە کاندیدەکان دەنگی پێویستی بەدەستنەهێناوە، پێشبینی دەکرێت هەڵبژاردنی پاپای نوێ چەند هەفتەیەک بخایەنێت.

ئەوەی پێویستە بیزانیت: لە ئەگەری هەڵبژاردنی پاپای نوێ، دووکەڵی سپی لە کەنیسەی سیستین دەردەچێت وەک ئاماژەیەک بە سەرکەوتنی هەڵبژاردنەکە و دیاریکردنی پاپای نوێ بۆ کەنیسەی کاسۆلیک.