هاتووچۆی سلێمانی لەبارەی ڕەشکردنی جامی دواوەی ئۆتۆمبێل ڕوونکردنەوە دەدات

ئاڤا نیوز

بەڕێوەبەرایەتیی هاتووچۆی سلێمانی سەبارەت بە ڕەشکردنی جامی پێشەوە و دواوەی ئۆتۆمبێل ڕوونکردنەوەیەک بڵاو دەکاتەوە.

ڕاگەیێنراوی فەرمی: هاتووچۆی سلێمانی ڕایگەیاند: بەپێچەوانەی ڕێنماییەکانی جام ڕەشکردنی ئۆتۆمبێل لە سۆشیال میدیا و ئەو دووکانانەی کاری جوانکاری ئۆتۆمبێل دەکەن، بڵاوکراوەتەوە گوایە جامی بەردەم شۆفێر و جامی سەر سندووق (جامی دواوە) ئاساییە ڕەش بکرێت. ئەم کارە قەدەغەیە، لەبەرئەوەی ئاستی بینین کەم دەکاتەوە، پێویستە بەپێی ڕێنماییەکان کاریان بۆ بکرێت.

زانیاریی زیاتر: هاتووچۆی سلێمانی شۆفێران و دووکانەکانی جوانکاری ئۆتۆمبێل ئاگادار دەکاتەوە، لە کڕین و فرۆشتنی (لۆگۆی ڕێژە-ستیکەر) و گۆڕینی لەزگەی جامی ئۆتۆمبێل دوای ڕەزامەندی وەرگرتن لە بەڕێوەبەرایەتیمان بەڕێژەی بەرزتر قەدەغەیە، سەرپێچیکار ڕووبەڕووی یاسا دەکرێتەوە.

گۆشەیەکی دیکەی دیمەنەکە: سەرجەم مەفرەزە گەڕۆکەکانی هاتووچۆ ئاگادارکراونەتەوە ئامێری پێوەری ڕێژەی جام ڕەشکردن بەکاربهێنن، تا ئەو دیاردەیە بنەبڕ بکرێت و هەر شۆفێرێک پێچەوانەی ڕێنماییەکان ئۆتۆمبێلەکەی جام ڕەش بکات، سزا دەدرێت بە بڕی 500 هەزار دینار و دەست بەسەر ئۆتۆمبێلەکەیدا دەگیرێت بۆ ماوەی سێ ڕۆژ.