ناوی هەزاران کەس لە یەکەکانی 70 و 80 بۆ زەوی وەرگرتن بەرز دەکرێتەوە

ئاڤا نیوز

ناوی هەزاران پێشمەرگە لە یەکەی 70 و 80 بۆ وەرگرتنی زەوی ڕەوانەی وەزارەتی شارەوانی دەکرێت. هاوکات تاوەکو ئێستا نۆ هەزار پێشمەرگە لە وەرگرتنی زەوی سوودمەند بوونە.

چیرۆکی سەرەکی: زیاتر لە هەشت هەزار فۆرمی دابەشکردنی زەوی بۆ یەکەکانی 70 و 80 گەیشتووەتە وەزارەتی شارەوانی، وردبینیکردنی ئەو فۆرمانە دەستیپێکردووە و بۆ پەسەندکردنیان ڕەوانەی ئەنجوومەنی وەزیران دەکرێن.

لێدوانی فەرمی: سەربەست مەولوود دەڵێت: زیاتر لە سێ هەزار فۆرمیان لە یەکەی 70 و زیاتر لە پێنج هەزاریشیان لە یەکەی 80ـەوە بۆ نێردراون. هەروەها ناوی 13 هەزار پێشمەرگەی دیکەی یەکەی 80 ماوە بنێردرێن.

- تاوەکو وردبینیکردن بۆ تەواوی فۆرمەکانی یەکەکانی 70 و 80 نەکرێن، ڕەوانەی ئەنجوومەنی وەزیران ناکرێن، واتە دەبێت تەواوی ناوەکان بە یەک لیستی تایبەت ئامادە بکرێن و بە یەکجار ڕەوانە بکرێن.

لەلایەکی دیکەوە: وەزارەتی پێشمەرگە ڕایگەیاندووە، تاکو ئێستا نۆ هەزار پێشمەرگە لە وەرگرتنی زەوی سوودمەند بوون، لە قۆناغەکانی داهاتووشدا ڕێژەکە بەرز دەبێتەوە، بە کۆی گشتیی 65 هەزار و 667 هەزار پێشمەرگە بە حەوت قۆناغ بەپێی نزیکییان لە ناوچەکانی نیشتەجێبوونیان لە وەرگرتنی زەوی سوودمەند دەبن.