فایلی خەڵک؛ زۆرینەی دانیشتووانی گوندێکی ئاکرێ بەهۆی پیسبوونی ئاوی خواردنەوە نەخۆش دەکەون

ئاڤا نیوز

گوندی باقۆسپێی سەر بە ناحیەی گردەسێن لە سنووری قەزای ئاکرێ، ئاوەکەی پیسە و بەو هۆیەوە زۆربەی خەڵکی گوندەکە تووشی نەخۆشی گورچیلە بوون.

چیرۆکی سەرەکی: گوندەکە بەدەست کەمی و پیسی ئاوەوە دەناڵێنن، چونکە وەک پێویست ئاوی خواردنەوەیان نییە و ئەوەشی کە هەیە ئاوەڕۆی زیاتر لە 10 گوند دێتەوە سەر سەرچاوەی ئاوی خواردنەوەی گوندەکە و پاک نییە بۆ خواردنەوە و لەگەڵ ئەوەشدا هەندێک جار 15 ڕۆژ جارێک ئاویان بۆ نایێت.

ئەوەی پێویستە بیزانیت: گوندی باقوسپێی سەر بە ناحیەی گردەسێنە لە سنووری قەزای ئاکرێ، زیاتر لە 200 ماڵی تێدایە و هەزار و 600 کەس تێدا دەژیت.

زانیاریی پەیامنێر: سەلام موشیر، پەیامنیری ئاڤا لە ئاکرێ دەڵێت: دانیشتوانی ئەم گوندە ئاوی خواردنەوەیان پیسە، ئاوەڕۆی زیاتر لە 10 گوند دێتەوە سەر سەرچاوەی ئاوەکەیان، هەندێک جاریش 15 ڕۆژ جارێک ئاویان بۆ بەردەدرێتەوە، لەکاتێکدا ئەم گوندە لەسەر ڕووباری خازرە.

- خەڵکەکە زۆربەیان تووشی نەخۆشی گورچیلە بوون.

لێدوانی فەرمی: ئەحمەد سلێمان، بەڕێوەبەری ناحیەی گردەسێن بە ئاڤای ڕاگەیاند: تەنیا گوندی باقۆسپێ نیە، سێ گوندی دیکەش ئەو گرفتەیان هەیە، ئەو سنوورە ئاوی ژێر زەوی نییە تا بیریان بۆ لێبدرێت، ناچار پشت بە ئاوی ڕووبارەکە دەبەستن، لەسەر ڕووبارەکە کۆگایان بۆ دانراوە، لە پلانیشدایە پاڵاوگەیان بۆ دابنرێ و کێشەکەیان چارەسەر دەکەین.