سوودانی: دەمانەوێت پەیوەندییەکانی تورکیا و عێراق بەشێک بێت لە هاوکێشەی سەقامگیری ناوچەکە

ئاڤا نیوز

لەئەنقەرەوە، سەرۆکوەزیرانی عێراق خواستی وڵاتەکەی ئاشکرادەکات،  بۆ ئەوەی پەیوەندیی نێوان عێراق و تورکیا بەشێک بێت لە هاوکێشەی سەقامگیریی ناوچەکە.

چیرۆکی سەرەکی: ڕۆژی پێنجشەممە 8-5-2025  محەممەد شیاع سوودانی، سەرۆکوەزیرانی عێراق بە یاوەری شاندێکی باڵا گەیشتە ئەنقەرە و لەگەڵ ڕەجەب تەیب ئەردۆغان، سەرۆککۆماری تورکیا ڕێککەوتننامەیەکی 11 خاڵییان لە بوارەکانی سەربازی و ڕووبەڕووبوونەوەی تیرۆر، گۆڕانکارییەکانی کەشوهەوا و بەرەنگاربوونەوە و ڕێگریکردن لە بازرگانی ماددەی هۆشبەر واژۆکرد.

ڕاگەیێنراوی فەرمی: ئاژانسی هەواڵی ئەنادۆڵ بڵاویکردەوە: لەمیانی بەشداریکردنی لە پانێلێکدا لە ئەنقەرە، سوودانی ڕایگەیاند: دەمانەوێت پەیوەندییەکانی تورکیا و عێراق بەشێک بێت لە هاوکێشەی سەقامگیریی ناوچەکە،  چونکە پێگەی تورکیا زۆر گرنگە بۆ ئێمە.

-ڕێگەی گەشەپێدان بە سەرپەرشتی عێراق و تورکیا یەکێکە لە پرۆژە گرنگەکانی ڕۆژهەڵاتی ناوەڕاست .

- پڕۆژەی ڕێگەی گەشەپێدان پڕۆژەیەکی ستراتیژییە بۆ وڵاتانی ناوچەکە، بەتایبەت بۆ تورکیا.

- حکومەتەکەی نەتانیاهۆ هەوڵدەدات هەموو ناوچەکە ڕاپێچی شەڕێکی خوێناوی بکات.
 

- عێراق دەستوەردان لە کاروباری ناوخۆی وڵاتانی دیکە ڕەتدەکاتەوە، ئەو بابەتەش یەکێکە لەبەرنامەی کاری حکومەتەکەی.

- پرسی ئاو بۆ عێراق هەستیارە، حکومەتەکەمان بەگوێرەی ڕێککەوتنە هاوبەشەکان لەگەڵ وڵاتانی دراوسێ مامەڵە دەکات.

- هاوکارییەکی بەرفراوان لە نێوان عێراق و تورکیا لە بواری بازرگانی و وەبەرهێناندا هەیە.

- تورکیا پڕۆژەی وەبەرهێنانی گەورەی لە عێراق هەیە.