تای خوێنبەربوون گەیشتە پارێزگایەکی دیکەی عێراق

ئاڤا نیوز

ئامارەکان تووشبوون بە تای خوێنبەربوون لە پارێزگاکانی عێراق تاوەکو دێت بەرزتر دەبێتەوە، چوار حاڵەتی گوماناوی و یەک حاڵەتی پشتڕاستکراوەی پەتاکە لە پارێزگای میسان تۆمار دەکرێن. لە هەرێمی کوردستانیش بە دیاریکراوی لە پارێزگای دهۆک یەکەم حاڵەتی گیان لەدەستدان تۆمار دەکرێت.

 

وێنە گەورەکە: بەپێی دوایین ئامارەکانی وەزارەتی تەندروستیی عێراق ژمارەی توشبووان بە تای خوێنبەربوون تاوەکو ڕێککەوتی  7ـی ئایار، گەیشتبووە 54 حاڵەت و گیانیان لەدەستدانیش هەشت حاڵەتە کە چواریان لە کەرکووک بوون.

 

بینراو و بیستراو: بەگوێرەی گرتەیەکی ڤیدیۆیی کە تێیدا چەند کارمەندێکی تەندروستیی دەردەکەن لە نەخۆشخانەی لەدایکبووانی پارێزگای میسان، ئاماژە بە بوونی چوار حاڵەتی گوماناوی و حاڵەتێکی تووشبوون لە پارێزگاکە دەکەن و هاوکات ئاماژە بۆ ئەوە دەکەن لەنێو نەخۆشخانەکە شوێنێک بۆ تووشبووان تەرخان کراوە.

 

ئەوەی لەوبارەیەوە دەگوترێت: محەممەد قاسم، وتەبێژی ڕاگەیاندنی بەڕێوەبەرایەتیی تەندروستیی میسان بە میدیای عێراقی ڕاگەیاند، تەنها دوو حاڵەتی گومانلێکراو تۆمار کراون، کە گواستراونەتەوە بۆ بەشە گوازراوەکان لە شاری عەمارە و نموونەی پێویستیان لێ وەرگیراوە و ناردراون بۆ تاقیگەی ناوەندی لە بەغدا"، ڕوونیشی کردەوە کە "ئەنجامەکان لە کاتژمێرەکانی داهاتوودا دەگەن بۆ یەکلاکردنەوەی تووشبوون یان نەبوونیان".

 

لەلایەکی دیکەوە: ئەمڕۆ شەممە تەندروستیی دهۆک، تۆمارکردنی یەکەم حاڵەتی گیان لەدەستدانی بە تای خوێنبەربوون لە پارێزگاکە ڕاگەیاند.

لێدوانی فەرمی: مەتین جەمیل، بەرپرسی ڕاگەیاندنی تەندروستیی دهۆک بە ئاڤا میدیای ڕاگەیاند: یەکەم حاڵەتی گیان لەدەستدان بە تای خوێنبەربوون لە دهۆک تۆمارکرا، کە ژنێکی خەڵکی قەزای ئامێدییە.

لە بەرامبەردا: ئێستا هیچ حاڵەتێكی تووشبوون بە نەخۆشی تای خوێنبەربوون لە پارێزگای كەركووک نەماوە و ئەو تووشبووەی كە لە نەخۆشخانە بوو، دوای وەرگرتنی چارەسەریی پێویست، چاكبووەتەوە و ڕەوانەی ماڵەوە كراوە.

ژمارەکان وادەڵێن: تووشبوون بە پەتای خوێنبەربوون بەگوێرەی پارێزگاکان:

 

زیقار: 17 حاڵەتی تووشبوون.

کەرکووک: پێنج حاڵەتی تووشبوون و چوار حاڵەتی مردن.

موسەننا: شەش حاڵەتی تووشبوون و دوو مردن.

واست: پێنج حاڵەتی تووشبوون و حاڵەتێکی مردن.

دیالە: دوو حاڵەتی تووشبوون و حاڵەتێکی مردن.

نەینەوا: سێ حاڵەتی تووشبوون.

بەسڕە: سێ تووشبوو.

بەغدا: سێ تووشبوو.

ئەنبار: یەک حاڵەتی تووشبوون.

هەولێر: یەک حاڵەتی تووشبوون..

دهۆک: یەک حاڵەتی مردن.

میسان: یەک حاڵەتی گوماناوی.

ئەوەی پێویستە بیزانیت: تای خوێنبەربوون نەخۆشییەکی ڤایرۆسی مەترسیدارە، لە کۆتایی حەفتاکانی سەدەی ڕابردووەوە بڵاوبووەتەوە، لەلایەن ئاژەڵی توشبوو یان گۆشتەکەیەوە دەگوازرێتەوە، هاوکات لەلایەن گەنەوە دەگوازرێتەوە و تووشی مانگا و مەڕ و ئاژەڵەکانی دیکەش دەبێت.