چوار كۆڵبەری كورد بریندار دەكرێن و كۆڵبەرێكی برینداریش گیان لەدەستدەدات

ئاڤا نیوز

هێزە ئەمنییەكانی ئێران لە سنووری ڕۆژهەڵاتی كوردستان و هەرێمی كوردستان، ڕاستەوخۆ تەقە لە چوار كۆڵبەری كورد دەكەن و برینداریان دەكەن،كۆڵبەرێكیش كە نۆ ڕۆژ بە برینداری مابووەوە گیانی لەدەستدا.

ڕاگەیێنراوی فەرمی: ڕێكخراوی هەنگاو بۆ مافەكانی مرۆڤ بڵاویكردەوە: ڕۆژی پێنجشەممە  14ی مارسی 2024  بەهۆی تەقەی هێزە چەکدارەکان لە ژمارەیەک لە کۆڵبەران لە سنووری "هەنجیران"ی مەریوان، کۆڵبەرێکی لاو بەناوی ئالان محەممەدی تەمەن 24 ساڵ بەسەختی بریندارکرا.

زانیاریی زیاتر: پێشتر دوو کۆڵبەری خەڵکی گوندی "هەشەمێز" سەر بە شاری سنە بە ناوەکانی کۆسار ئەحمەدی تەمەن 24 ساڵ و کەیهان ئەحمەدی تەمەن 43 ساڵ بە تەقەی ڕاستەوخۆی هێزە حکومەتییەکان  بریندارکراون. هاوکات کۆڵبەرێک بەناوی سەعدی حوسێنی، خەڵکی بانە لە سنووری "هەنگەژاڵ"ی ئەو شارە بە تەقەی هێزە چەکدارەکانی حکومەت بەسەختی بریندارکرا.

 

لەلایەكی دیكەوە: بەپێی ڕاپۆرتی ڕێكخراوی مافی مرۆڤی هەنگاو، شەوی پێنجشەممە  14ی مارسی 2024 عەتا حوسێنی كۆڵبەری تەمەن 32 ساڵی خەڵكی گوندی "بلەبزان" سەر بە شاری پاوە، دوای نۆ ڕۆژ مانەوە لە نەخۆشخانەی تاڵقانی كرماشان، بە هۆی سەختی برینەكەیەوە گیانی لەدەستدا.

باكگراوند: بە گوێرەی ئامار و بەڵگەنامەکانی هەنگاو، لە مانگی دووی ئەمساڵ بەلایەنی کەمەوە چوار کۆڵبەر گیانیان لەدەستداوە و 63ـی دیکەش برینداربوون.